Павел болн Сила

Урднь Савл христианмудт дурго болад, тедниг даҗрад көөдг билә, ода болхла эн Сән Зәңг тархахин төлә ик көдлмш кедг болв. Энүнлә болсн хүврлтиг темдглҗәх метәр Савлыг ик зууднь Павел гиҗ нерәддг болв. Бийән дахсн нег саната цөөкн улсла эн Европур зуульчлв. Альдаран Павел ирвчн, эн түрүн болҗ иудеймудта харһхан хәәдг билә, тедннь эврә синагог уга болсар Бембә өдр болһн һаза хурдг бәәсмн. Иим нег хургин дару энүнүр байн хувцта күүкд күн өөрдҗ ирв. Терүнә нерн Лидия, Иисусин тускар келҗ өгтхә гиҗ сурв.

Күүндән зөвәр удан болв. Чилгчәрнь Лидия келв:

- Бурхн намаг Эврә үрн гиҗ тоолтха гиһәд, нанла хамдан зальвртн гиҗ сурҗанав. Дәкәд би кирслгдхәр бәәнәв.

Дарунь Лидия кирслгдснәннь хөөн Павлыг үүрмүдтәһән терүнә гертнь бәәтхә гиҗ дуудв. Зуг Павел болн энүг дахҗ йовсн Сила, энүнә герт удан бәәсн уга. Юңгад гихлә цөөкн хонг болад, балһсна зарһч эдниг түүрмд орулв. Иудеймуд энд грек болн римлян дунд Иисусин тускар келснд, балһсна зәрм бәәрн улс уурта билә. Павел болн Сила хойриг түүрмд орулв, тедниг һар-көләснь чолуһар боосмн. Павел болн Сила босх биш көндрҗ чадлго бәәв.

Болв Иисусин тускар цәәлһдг эн хойр күн Бурхн эднлә хамдан түүрмд чигн бәәхинь медлә. Эннь эднд чидл урһадг, зөрг өгдг билә.

Бурхна залус байрлад, Бурхиг магтҗах ду дуулцхав. Түрүләд арһулхнар, цааранднь улм чаңһар, өөр шидр бәәх камермудт соңсгддгар дуулцхав. Түүрмд сууһа бәәҗ, әмтн иим байртаһар яһад дуулдг болхм гиҗ, өөрнь суусн улс итклго бәәцхәв.

Генткн әмтнә дун талдан нег әәлә негдв: күрҗнсн ә соңсгдв. Дарук саамднь эргндән цугинь чичрв. Һазр чичрлһн! Гер чичрв, зуг нурсн уга.

Түүрмин герин улын чолуд көндрәд заагрҗ одсна учрар, бәрәнд бәәсн улсин һар-көлнь сулдв, һазаран һардг үүднь бас секгдв.

Һазрин чичрлһнәс түүрмин хәләһәч серв. Босн, үүдн секәтәг эн үзв.

- Цуг түүрмд суусн улс гүүҗ одв, - гиҗ эн санв. - Намаг чаңһ засгла харһулх. Түүнә ормд эврән әмнәсн хаһцнав.

Хәләһәч үлдән һарһад, бийән шаахар бәәхиг үзсн Павел чаңһур хәәкрв: «Бичә тииг! Бидн цугтан бәәнәвидн!»

Негичн күн эс зулсиг медәд, хәләһәч Павел Сила хойриг теврв. Кемр эднә Бурхн эдниг сулдххар һазр чичрүлҗәхлә, Эн үннч Бурхн болҗана.

- Мини нойдуд, бийән харсҗ авхин төлә би ю кехмби?

- Деед Эзн Иисуст итк, тегәд чи бийән харсҗ авхич, - гив Павел.

Терүнә хөөн түүрмин хәләһәч эн хойриг герүрн дуудв.

Павел Сила хойр цаһан седклтәһәр энүг дахв, зууран Иисусин тускар келҗ өгцхәв. Иисус мел сән юм кедг бәәснә тускар, Иисус Бурхна көвүн гиҗ әмтн медәд, иткдгин тускар цәәлһҗ өгцхәв. Яһҗ римск салдсмуд Иисусиг гем эс һарһсн бийнь, кирст хадсна тускар эдн келҗ өгв. Эдн, Павел болн Сила, бийснь дааҗах даҗрлһндан алң болҗахн уга. Юңгад эдниг Деед Эзнәс деер гиҗ тоолхм? Түүрмин хәләһәчин герт бәәсн улст эдн Иисус цуг әмтнә килнц даахин төлә, күн болһна төлә әмән өгснә тускар цәәлһв. Тенд кирс деер Бурхн күн хоорнд чик бәәдл тогтхин төлә, Эн олна килнц Бийдән авв. Павел Сила хойр Христосин әмдрлһнә тускар келхән мартсн уга. Әрүн Сәкүсәр дамҗҗ Иисус оньдин Бийднь иткдг улсла бәәдгин тускар цәәлһцхәв.

- Би бас Иисусла бәәхәр седҗәнәв! - гив хәләһәч. - Намаг бас Эврәннь үрн гиҗ Эн автха!

- Кемр Бурхн күүкд улсиг бас авдг болхла, би бас Энүнд церглхәр седләв, -гиҗ энүнә гергн келв.

Павел келв:

- Тиим, Сән Зәңг бас күүкд улсла ирлцнә, бичкдүдлә бас ирлцҗәнә. Тана балһснд нег күүкд күн христианк болчкв.

Күүндврән төгсәчкәд, кирслгдснә хөөн герин эзн Павел Сила хойриг хот эдлтхә гив. Нарн һарсн цагла эдн Лидиян герүр адһцхав, тернь эднд санань зовҗала. Ода Павел болн Сила энүнд Бурхн яһҗ эдниг хәәрлснә тускар биш, болн түүрмин хәләһәчин өрк-бүл яһҗ эн сө Деед Эзнд мөргҗ орсна тускар цугинь келцхәв.