Иоаннд Иисус Христосин ил секллһн

Иисус Христост Бурхна Көвүнә иткл ик күчтә бәәсмн, тер учрар тедн көөлһнәс, үкләс әәлго, әмән әрвлҗәсмн уга. Тегәд христианмудыг көөсн цагт кесг апостолмуд икәр зовагдҗ, Иисусин төлә әмән өгсмн. Зуг Иоанн Иисусин арвн хойр апостолмудын негнь әмд бәәҗ. Эн наадк апостолмудас хамгин баһ наста билә. Ут нас наслад, йирн настадан Ефес балһсна христианмудын хургт орлцдг гешүн бәәсмн. Иоанн Христосин төлә бас зовлңган эдлсмн. Иоанныг Средиземн теңгсин Патмос нертә хагсу арлур туусмн. Тенд түүрмин улсас болн теднә харулчнрас талдан күн уга билә. Эн шууган уга, төвкнүн Патмос арлд Бурхн Иоаннла күүндв. Бурхн иигҗ терүнд келсмн: «Иисус күчтә хан болҗана! Тегәд Терүнә христианмудыг көөдг болвчн, теднә җирһл Иисусин һарт бәәнә!»

Дәкәд Бурхн делкән тууҗин сүл өдрмүдин чилгчнь ямаран болхинь Иоаннд үзгдлмүдәр болн зургудар үзүлсмн. Тиим арвн хойр үзгдл бәәсмн. Теднә тускар Иоанн «Ил секллһн» гидг нертә Библин сүл дегтрт бичлә.

Деед Эзнә Элч Бурхнд иткдг улст белдсн теңгрин сәәхн чигн туурмҗиг сүл үзгдлһнд Иоаннд медүлҗ. Бурхна болн Хурһна ширәһәс асхрҗах олн өңгцтә гилвксн шил мет җирһин һол болн шин таралң апостол Иоанн үзв. Тер һолын эрг деер җирһлин модн урһҗаснь бас үзв.

Эн теңгрин таралңд нег чигн күн килнц кешго, юңгад гихлә Иисус Христос килнциг диилчксмн. Килнцин харңһу сө, эс иткллһн, үкл төрүц иршго, юңгад гихлә Деед Эзн Бурхн тедниг уга кех. Эврәннь әмн-җирһлән Иисусин күчәр аврсн, Бурхнд иткдг улс Иисусла хамдан Бурхна Теңгрин Орн-нутгт мөңкиндән залх.

«Чини үзсн, соңссн юмн цугтан иткмҗтә болн үнн,» - гиҗ Бурхна Элч Иоаннд келсмн.

Аш сүүлңк үзгдлд Бийнь Деед Эзн Иисус апостол Иоаннла мендләд һарчаһад иигҗ келв:

- Би Альфа болн Омега, түрүңк болн сүүлңк. Би Давид хаана үңг-тохм болн үй, өрүни сарул одн! Би удл уга ирхв!

- Тиигтхә! Иисус Деед Эзн бууҗ ир! - гиҗ Иоанн хәрү өгв.