Петр түүрмд

Римск нойн Гай Цезарь Алдр Иродын ачиг, Иродын Агриппаг, Иерусалимиг болн Палестина ик зууһинь толһалтха гив.

Терүнә цагт христиан улсиг көөҗ таралһн эклв. Иудейин толһачнр болн терүнә өөрхн улс Христосин сурһульчнрт болн Апостолмудт дурго бәәсиг Ирод медлә. Тедниг бийдән седклинь тусулхар, Ирод Иоанна ах, апостол Иаковиг алх заквр өгв. Иудеймуд эн заквриг таасҗ зөв өгнә, тегәд тер Петриг бәрҗ авад түүрмд суулһх заквр өгв.

Петриг түүрмд суулһв, 16 дәәч энүг өдр сө уга манна.

Ирод Апостол Петриг цааҗлһна өдр келҗ өгв, болв чонҗд цуһлрсн улс терүнә төлә Бурхнд зальврцхав. Иерусалимд эн цагт нань апостолмуд уга билә. Иродин көөҗ таралһнас бултад, эдн балһсан үлдәһәд һарч йовв. Иерусалимд һанцхн апостолмуд биш Христосин олн сурһульчнр үлдсн бәәҗ. Эдн Иоанна экин герт цуһар цуглурад, Петрин төлә зальврцхав.

Түүрмд бәәсн Петр тер цагт унтҗ кевтлә. Терүг өдр сө уга хойр цергч манна. Балһсн тал һардг төмр үүднд болн түүрмин үүдн хоорнднь бас маначнр зогсҗана. Энүнәс Петрт сулдҗ һарч болшго?! Уга. Эн сулдҗ һарһхар седсн уга.

Акад юмн болв. Генткн Петрин өмн Деед Эзнә элч ирәд, терүнә бәәриг герләр асхв. Петр батар унтҗ кевтлә, Бурхна Элч энүг хәврһнь түлкҗ серүлнә:

- Шулуһар бос! - гиҗ келв.

Эн цагла Петрин һартнь бәәсн цев эврән шувтрад унҗ одна. Бурхна элч Петрт бүсән бүсләд, хувцан өмскәд, намаг дах гисн заквр өгв. Эн цагла цергчнр батар унтҗ одла.

Энүнә хөөннь Бурхна элч иигҗ келв:

- Намаг дах!

Түүрмин секәтә үүдәр Петр Бурхна элчиг дахад һарад йовна. Унтсн маначнриг давад һарад, Бурхна элч Петриг төмр үүднд күргнә. Теднә өмн төмр үүдн эврән секгднә. Тедн балһснас һарад йовҗ йовтлнь генткн Бурхна Элч уга болҗ одна.

Петр генткн сергәд иигҗ келв:

- Нанд Деед Эзн Бурхна Элчән илгәсиг ода би медҗәнәв. Намаг алхар седсн иудеймудын болн Иродын һарас тер сулдхв.

Хөөннь учрсн йовдлыг сәәнәр медҗ авчкад, эн герүр ирнә, тенд Бурхнд иткдг улс Петрин төлә зальврцхав. Петр герин үүд цокна, терүг соңссн зарц күүкд күн һарч ирнә. Петриг дууһарнь таняд, эн байртаһар үүд секхин ормд, хәрү гүүҗ герүр орад, Петр үүдн хоорнд зогсҗана гиҗ зәңглв. Сурһульчнр иим зәңгднь итксн уга, юнгад гихлә эдн герин өмн Бурхн илгәсн Петриг харсҗ йовх Бурхна Элч зогсҗана гиҗ санв.

Петр болхла зогсл уга үүд цокад бәәв. Болв үүдиг секхлә, цугтан Петриг үзәд әвр гидгәр өврцхәв. Эдн цуһар йир икәр байрлцхав! Петр цуглрсн улсиг тогтнулхар һарарн докъя өгнә. Тагчг болв. Деед Эзн түүрмәс бийән яһҗ һарһсиг әмтнд Петр келҗ өгв.

Ирод бичә олҗ автха гиһәд Петр Иерусалимас һарад талдан һазрур йовна.