Римур йовлһна Павлын хаалһ

Павел болн терүг дахсн улс Иерусалимин чонҗд ирв. Тер чонҗин улс икәр байрлв! Терүнә цергллтәр дамҗулад талдан келн улс дунд Бурхн ю кесинь Павел тодрхаһар келҗ өгв. Цуг әмтн Деед Эзнә үгин күчиг туурулҗ тархав. Болв теднә байрнь удан болсн уга.

Иерусалимд ирәд, долан хонгин хөөн Павел сүмд одв. Бурхнд үг өгсн төләдән Павел Терүнд бәрц бәрв. Иудейнр терүг үзәд, Иисусин тускар келдг күүг таньв. Тер номин тускар эдн юм-чигн медхәр седҗәсмн уга. Тедн Павлыг бәрҗ авв. «Эн күн мана закана өмнәс ном эргндән тархаҗ йовна. Мана сүмд грекмуд дахулҗ ирәд, терүг бузрдв,» - гиҗ хәәкрцхәв. Сүмин дотр алҗ болшго болад, Павлыг бәрәд сүмәс чирҗ һарһв. Болв Иерусалим кевтән үүмҗәх зәңг Римин цергин ахлачд Клавдий Лисийд күрнә. Тиигхлә тер Павлыг цевәр цевләд бәәшңгд орултха гисн заквр өгнә. Хаалһднь Павел олн улсла күүндх зөв сурв. Яһҗ Деед Эзнд ирсән, яһҗ килнцән тәвүлгдснә тускар эн иудеймудт келв. Түрүләд иудейнр Павлыг оньган өгч соңсҗала. Зуг Бурхн энүг талдан келн улс тал йовулад, Бурхна тускар кел гисн үгин хөөн тедн шууглдад хәәкрцхәв. «Эн күн әмд бәәх йосн уга» - гиҗ тедн хәәкрв. Клавдий Лисий кел бәргдсн эн күн әмтнә ур күргүләд бәәсинь үзчкәд, Павлыг бәәшнгд орулх заквр өгв. Эврәннь цергчнртән Павлыг цокад, гөвдәд сурвр кехинь закв. Тиигхлә, тернь келв:

- Зарһ кеһәд уга бәәҗ Римин иргниг гүвдҗ болдв?

Римин улс нег цаг-зуур үүмәд бәәв. Эдн Павлас сурлһ авсн уга, болв цевинь тәәлсн уга.

Маңһдуртнь Павел синедриона өмн зогсв. Эднә хоорнд зүтклдән болв. Зәрм улс терүг бурушав, наадкснь му юм эн һарһсн уга гив. Үүмлһн өсәд бәәв. Иудеймуд Павлыг икәр шахад бәәв. Клавдий Лисий Павлыг һалзурсн әмтн шуучх гиҗ әәһәд, терүг бәәшңгүр күргтн гиһәд эврәннь цергчнртән закв.

Сөөднь Деед Эзн Иисус Павлур ирәд иигҗ келв:

- Юунас чигн бичә ә! Мини тускар герчлснә әдләр Римд бас чи үгән келхч.

Удан цагт цүүглдән болад болн Павлыг иудейнр олн дәкҗ алхар бәәснә хөөн терүг императорин зарһд йовулхар шиидв.

Энүнә төлә Павел Римур одад, тенд Бурхна үг императорт келх зөвтә билә. Тиим кевәр Бурхн Эврә тәвсн күслән күцәв.

Павел Кесария гидг гаваняс кермәр һазр эргв. Эднә хаалһнь хол болн әәмшгтә болв.

Эн цагла Средиземн теңгст ик догшн салькн болв. Бичкн модн кермәр усчхд йир әәмшгтә. Павел ик урдаснь теңгсчнрт тер әәмшгин тускар келдг билә, болв тедн энүг соңсдго бәәҗ.

Нег өдр усна ик аюл болв. Өндр дольгас кермиг наран-цааран шивәд бәәв. Кермән аврхин төлә ацана ик зууһинь уснд хайчкв. Болв теңгсин аюл эднд ик харшлтан күргәд бәәв. Цөөкн өдрт теңгсин дольганд керм хайгдад бәәв. Әмд үлдх иткл чиләд бәәв. Тиигхлә Павел салькиг дарҗ хәәкрв:

- Үүрмүд! Бичә әәтн! Таднас нег чигн күн үкшго, зуг керм хамхрх. Би терүгинь меднәв, юңгад гихлә, сөөһәр нанур Бурхна Элч ирв. Би Терүнд церглҗәнәв. Тер нанд келв: «Павел бичә ә! Чи Римин хаана өмн зарһд зогсхич!» Үүрмүд, саг-серглң бәәтн! Би Деед Эзнд иткҗәнәв. Терүнә келсәр лавта болх!

Арвн дөрвдгч өдртнь догшн салькна хөөн теңгсчнр һазр үзв. Болв тедн һазрур өөрдҗ чадсн уга. Керм хәр һазрла харһҗ. Кермин өмнк хамрнь элснд шаагдҗ орад, көндрлго зогсв, кермин ар хүвнь дольгана цоклһнд тарҗ оч. Зуг әмтн әмд үлдв. Тедн теңгсин көвәд күрв.

Деед Эзн Үгдән күрв! Нег чигн күн үксн уга. Иисусин нер туурулхин төлә ода Бурхна күсл күцҗ чадҗана.

Бурхн ончта кевәр Павелд Римур ирх зөв өгв. Римин ахлачд Павел эврәннь итклин тускар герчлсндән Деед Эзнд ханлт өргв.

Павел Рим балһснур түүрмин бәрәнә күн биш, зуг Иисусин герчләч болн Теңгрин хаана элч болад ирсмн!