Тавифан әмдрлһн

Нег дәкҗ апостол Пётр Иерусалимас хөрн дууна һазрт өөдмтә селәнур һарч одв. Эн Лидда гидг нертә селәнә кесг улс Деед Эзн Иисусд иткдг бәәҗ. Петр теднд бурхна тускар келхдән дурта билә. Еней гидг нертә нег күн икәр гемтсн бәәҗ. Нәәмн җилдән эн күн тәкрәд орнасн бослго кевтсн бәәҗ. Петр терүнд келв:

- Еней, Иисус Христос чамаг эдгәҗәнә. Орнасн бос!

Тиигхлә эн босв. Петр: «Би чамаг эдгәхв гиҗ келсн угав», юңгад гихлә, һанцхн Христосин күчн гемтә кү эдгәдгинь Петр меддг билә. Енейин гемин тускар меддг улс терүг үзхәр адһв. Болв Енейиг эдгснь үзәд, олн әмтн Деед Эзнд иткдг болв.

Лидда селәнәс һучн дууна һазрт теңгсин көвәд Иоппия гидг балһсн бәәҗ. Лидда селәнә зәрм әмтн тиигәрән одад, яһҗ апостол Петр тәкрсн гемтә кү эдгәһәд, Иисусин нерәр терүнд чидл өгч босхсна тускар келҗ.

Тиим зәңг соңгсад бәәрн улс апостол Пётриг теднүр иртхә гиҗ дуудв. Юңгад гихлә, тер цагла нег гергн гемтәд өңгрҗ. Тер Тавифа гидг нертә билә. Эн гергн олн угатя әмтнд тусан күргдг билә, тиигәд эдн энүнә өңгрлһнд һашун нульмсан асхрулла. Үүрмүднь энүнә оршалһна керг-үүлдврт белдвр кеһәд, зуг Петриг оршалһна өмн эднүр иртхә гиҗ сурҗ. Иоппия балһснд ирәд, Петр хорад орна. Тенд Тавифан өөрхн үүрмүд болн белвсн күүкд улс хурҗ. Теднд Тавифа нөкд болдг билә. Угатя күүкд улс нульмсан асхрулад, Тавифан уйҗ өгсн хувц-хунран апостолд үзүлж. Эдн нег-негндән седклән өгсн улс билә.

Хорад нег чигн кү үлдәлго Петр цугтаһинь һарһчкна. Тедниг һархла, эн өвдгән дарад сууһад Деед Эзнд зальврна. Тавифан кевтсн цогц тал эргәд келнә:

- Тавифа, бос!

Күүкд күн нүдән секнә. Петриг үзәд, босад суув. Петр һаран өгәд, терүнд босхднь дөң болна. Дарунь Бурхнд иткдг улсиг болн белвсн күүкд улсиг дуудҗ авна. Күләҗәсн әмтнд Петр әмд Тавифаг хәрү өгв. Теднь йир икәр байрлв!

Деед Эзн Петрин зальврлһар эн өврмҗтә йовдл кесиг цуг олн әмтн меддг болв. Тиигәд олн-әмтн Деед Эзнд иткдг болв.