Эммаус ордг хаалһд болсн харһлт

Иерусалимас Эммаус балһснур хойр сурһульч му бәәдлтә йовҗ йовсмн. Тедн хаалһдан цуг учрсн йовдлын тускар хоорндан күүндҗ йовна. Иисус Эврәннь әмтиг сулдхад, алдр хан болх гиһәд эдн иткҗ йовсмн. Ода болхла эн әмд биш... Болв Иисус әмд гиҗ балһсна әмтн келнә... Эдниг эн зәңг йир икәр алмацулв.

Тедниг иигәд күүндәд йовтлнь Нег Күн өөрдҗ ирв. Эн Иисус билә. Сурһульчнр Иисусиг таньсн уга, юңгад гихлә Деед Эзн Иисусин бәәдл-зүснь сольҗ. Нег агчм зуур цагтан Иисус тагчг йовв, бәәҗәһәд теднәс сурв:

- Юуна тускар тадн күүндҗ йовнат? Юңгад тадн гейүрсн бәәдлтәвт?

- Иерусалимд эн өдрмүдт юн учрснь һанцхн чи меддго болхч! - гиҗ эднәс негнь келв.

Сурһульчнр сүл өдрмүдт болсн йовдлмудын тускар Терүнд келҗ өгв. Тедн келврән төгсәһәд, цаарандан тагчг йовцхав. Иисус тедниг соңсад иигҗ келв:

- Бурхна Үгд юуна тускар келгдҗәхинь тадн медҗәхшт? Юн болхинь тадн медх зөвтә биләт. Христос Бурхна Көвүн әмтнә килнцин учрар ик зовлң эдлснәннь хөөн Бурхна туурмҗд орх зөвтә. Энүнә тускар Моисейин болн әәлдәчнрин Бурхна Үгд бичәтә.

Иисус Бурхна Үгин тасрхас цәәлһҗ өгв. Сурһульчнрас ик зунь меддг бәәҗ, зуг зәрмснь-әәлдәчнрин келсн үгмүд ода күртл меддго эс гиҗ иткдго бәәҗ. Ода эднд цугнь медгддг болв. Бурхна Үгәр иим юмн болх зөвтә бәәсмн! Әмтнә төлә үкх, әмтиг килнцәс һарһхин төлә Деед Эзн болн Багш маднур ирсмн. Хәрү әмдрҗ ирхин төлә, Эн әмән өгсмн. Эн хара бишәр өңгрв. Иисус өңгрәд, хөөнь әмдрх.

Сурһульчнр оньгтаһар соңса бәәтл, теднә зовлң тарҗ одв. Кен эднлә хамдан йовсиг, эдн одачн медәд уга.

Эдн Эммауст өөрдҗ йовхлань сурһульчнр Энүг хамдан хот эдлхиг сурв. Хот уух цагт Иисус булсн һуйр авад, Бурхнд ханлт өргәд, һуйриг хуваһад теднд өгв.

- Иигҗ даңгин Иисус кедг билә, - гиҗ, эн хойр ухалв, тер кемлә медв: теднә өмн Иисус суула.

Түрүн болҗ Терүг таньсн уга, зуг ода медв - эн Иисус.

Зуг тер дарунь Иисус үзгддгән уурв.

Юңгад Терүг мадн таньсн угавидн! Терүг хаалһдан маднд Бурхна Үгин чинр цәәлһҗ келсн цагт мана зүркн бульглад, шатсн болҗ медгдлә! Иисус теднә өөр уга болвчн, эдн хоюрн гейүрсн уга. Иисус әмд! Эн өдрлә ик байран талдан сурһульчнрла хувалцхар седцхәв. Сурһульчнр босад, Иерусалим тал адһв, Иисусин сурһульчнр бәәсн герүрн одцхав.