Авраам Бурхнд дуртаһинь сөрлһн

Авраамин болн Саррин өрк-бүлд көвүн Исаак төрснә хөөн эднә өрк-бүл улм җирһлтә, бат болв. Эдн цуһар нег-негндән болн бурхндан йир дурта болцхав. Бидн меднәвидн, Авраам йир байн күн бәәсмн. Зуг зүркән, дуран, седклән нег «эрдньд» өгнә - эннь көвүн Исаак. Авраам көвүндән йир дурта бәәсмн, зуг Бурхиг улм икәр дурлдг билә.

Нег дәкҗ Деед Эзн Авраамиг ямр итклтәһинь болн дуртаһинь медхәр сөрҗ хәләв. Үүдәч Авраамд келв:

- Ор һанцхн дурта көвүһән Исаакан авад, мини нег заасн уул деер бәрц тәв.

Авраамд йир күнд йовдл харһв. Зуг келсинь күцәхәр седв, юңгад гихлә Бурхнд әрүн седкләрн дурлдг бәәсмн. Авраам түләнә мод хамхлад, элҗгн деер ачад, хойр зарц бийтәһән авад хаалһдан һарцхав. Сарра болхла гертән үлдв. Хаалһнь йир ут болв. Эдн цуһар өрүн эртәс авн ора цаг күртл йовдг билә, зуг зәрмдән амрлго хәрү һарад йовцхана. Исаакд альдаран тедн йовхинь медхәр седв: «Тиим эцкд нег учр бәәһәд, ода чигн нанд үг келәд уга», - тиигҗ ухалв.

Авраамд йовлһна күцлин тускар тагчг бәәх учр билә. Бурхн урднь энүнлә күүндәд сүркә әәмшгтә юм келсиг Авраам ухандан авсмн уга. Йосар болхла Бурхн Исаакиг алхар седсн уга. Авраам терүнә өгсн зааврин чинринь медлго, болв терүг күцәхд белн болх угаһинь Бурхн үзхәр седнә.

Зуг Авраам энүг меддго билә. Эн эврәннь ор һанцхн дурта көвүһән бәрц бәрлһнд өгчәнә гиҗ ухалв. Тегәд эн йир икәр һундв. Ямаран күнд болвчн, эн Бурхна заавр күцәхәр седв.

Удл уга эдн өндр уулур күрч ирцхәв. Ода Исаак сурхар бәәсн юман бәрҗ чадсн уга.

- Эцк, энд модн болн һал бәәнә, тиигхлә чи бәрц бәрлһ кехәр бәәнәч, - гиҗ келв. Тәкл деер тәвх хурһн альд бәәхм? Авраам үг келсн уга, зуг энүнә хоолнь боогдад бәәв.

- Көвүн, мини, - гиҗ эн келв, - Бурхн Эврән тәкл деер тәвх хурһна тускар бийинь медх.

Уулур ирәд, эдн чолу цуглулв. Авраам чолу нег-негн деер тәвәд ик тәкл тосхв. Цааранднь Исаакиг бооһад модн деер тәвәд утх деернь өргв.

Эн цагла теңгрәс Бурхна Дун соңсгдна:

- Авраам, Авраам!

Көвүнә деер бәрҗәсн Авраамин утхта һар менрҗ одв.

- Э-э, Деед Эзн.

- Бичә көндә! - Бурхна Дун соңсгдв. - Чи намаг соңсад болн мини төлә чи эврәннь көвүһәрн бәрц бәрхәр бәәхиг би ода үзүв.

Авраамин чееҗнь сарулдна. Хөвтә җирһлтә болад эн тәклин өмн өвдгшлҗ унв. Чичрсн һарарн эн Исаакиг боодгаснь сулдхад, нөкд болҗ босхв. Эцк көвүн хойр нег-негән теврлдәд байрллад уульв.

Генткн эдн хөөнә ә соңсв. Авраам болн Исаак хөөнә хуц үзв, энүнә өвр шарлҗн заагт оралдҗ одсн бәәҗ. Эдн энүг бәрц бәрлһнд орулв. Тиигәд Авраамин келсн үг чик болҗ һарв. Бурхн бийдән эврән бәрц бәрх хурһ олҗ авв.

Уулас бууҗ йовад, эдн икәр байрлҗ. Исаак эцкиннь һар батар бәрв. Күүнд болн Бурхнд дуран өгнә гидгин тускар эдн ухалв. Әмтнд өгдг Бурхна дурн күн нег-негндән өгдг дурнас кезәд чигн давшго.