Иаков Исав хойр

Цаг давад, Исаак өсәд-босад, идр наста залу болв. Эн Реввека күүкнд дуран өгәд, гер-бүл болв. Теднә өрк-бүлд хойр көвүн төрв. Исаак Ревекка хойрин Иаков болн Исав гидг нертә көвүд икр болвчн, эднә заңгнь болн цогцнь әдл биш болҗ.

Түрүләд һарсн Исав чидлтә, эврә дурарн болн сансн санаһарн бәәдг билә. Эн саадгин сум болн саадг авад ө-шуһу моддар болн өндр толһасар йовад аңһучлхдан йир дурта бәәсмн. Зәрмдән Исав өдрин дуусн эс гиҗ долан хонгтан чигн кеер хонад, аңһучлад йовдг бәәҗ. Эн саадгар хаһад алсн зерлг шову оньдин гертән авч ирдмн. Исаак эцктән терүгәр шимтә хот шарҗ өгдг билә. Эцкнь Исавиг икәр дурлдг билә.

Реввека болхла Иаковд дурта бәәҗ. Иаков ахан дураҗ уга. Иаков йир тогтун, шатран эргәд, эк-эцкдән өдр болһн нөкд болад, эцкиннь малмуд хәләһәд бәәҗ.

Исав Иаковас ууһн көвүн бәәсмн. Тегәд Исав агчмин зуур түрүлҗ һарсндан, ууһн көвүн гиҗ тоолгдад, эцкиннь өнч авх зөвтә бәәсмн.

Тер цагин авъясар эцк күн өңгрхиннь өмн зуг ууһн көвүндән әдс өгч йөрәдг бәәсмн. Бурхн чамд һазрин урһц, ик буудя, чамаг күндлдг дала көвүдтә, күүкдтә болҗ, зарцнр, олн мал болн цуг чини һарт бәәсн кесг юмн өсҗ-өргҗҗ йовтха, - гиҗ, эцкнь ууһн көвүндән Бурхна әдсәр ут нас, байн җирһлтә болх зөв өгәд, йөрәдг бәәсмн.

Зуг Иаков дүнь онц әдс бийнь авхар оньдин санад, ухалад, дотран Бурхнас сурад бәәсмн. Исав болхла ууһн көвүн болсна тускар ухалдго билә, керг уга гиҗ тоолдг бәәҗ. Юңгад гихлә Исав кеер аңһучлхдан дурта бәәсмн.

Нег дәкҗ Иаков эдл-ахуһан хәләһәд, экдән нөкд болҗ йовла. Исав болхла кеер йовсмн. Һаза һал деер Иаков улан бурцгар буда чанҗасмн. Хотын каңкнсн үнр ик холд соңсгдад бәәҗ. Аңһучлҗ йовсн Исав муурад хәрҗ аашла. Эн удан цагин эргцд дала һазр эргәд аңһучлҗ йовсмн, тегәд икәр өлсҗ. Аңһучлдг зер-зевән һазр деер хаяд, Исав келв:

- Нанд идх хот шулуһар өглч.

Иаков тер дарунь хәрү өгв:

- Нанд ууһн көвүн болсн зөвән хулднч?

Исав иигҗ келв:

- Би харңһнад үкн гиҗәнәв. Ууһн көвүн болсн учрар нанд ямаран тус бәәхмб?

Тегәд Исав нег ааһ улан бурцг буда эдлхин төлә ууһн көвүн болсн зөвән Иаковд хулдсмн. Иаков дотран байрлв, юңгад гихлә энүнә сансн санань экләд күцгдҗәхнь медв. Ода эцкиннь әдс бийдән авхин төлә арһнь олх кергтә гиҗ Иаков ухалв.

Кесг җилмуд давв. Исаак көгшрәд, терүнә чидл болн нүднә харань муурад бәәҗ. Нег дәкҗ Исаак ууһн көвү Исавиг дуудад келв:

- Көвүн минь Исав, би кезә өңгрхән медҗәхшв. Би чамд эцкин әдс өгхәр седҗәнәв. Саадгин сум болн саадган авад, аңһучлад, аң хаһад авч ир. Мини дурлдг шимтә хот белдәд нанд авч ир. Би чамд әдс өгәд йөрәнәв.

Исав саадгин сум болн саадг авад йовҗ одв. Болв Реввека экнь нимгн шатрин һатцас Исаакин келсн үгинь соңсҗ.

Эн әәһәд иигҗ ухалв: «Мини залу Исаавд әдс өгхәр бәәнә!» Ревекка Иаковд йир эңкр бәәсмн.

Бурхна келсинь Реввекан сананднь орв: "Отхн чини көвүн әдстә болх". "Ода яахмб?" - гиһәд, эн Иаковур гүүҗ ирәд, соңссан терүнд келв. Дәкәд эн Иаковин чикнднь арһул келв:

- Хойр ямана ишк алад авч ир. Би Иаковла әдл тедндг шимтә хот шарҗ белднәв. Чи болхла Исавин ормд, эцкдән эн хот авч од. Тегәд эцкчн чамд әдсән өгх.

Цуг эн тоотыг белдәд бәәтл, өрәл өдр давв. Исавин хувц Ревекка авад Иаковд өгв. Иаков өмснә. Зуг Исавин һарнь ноосар бүркәтә билә. Иаковин һарнь ноосн уга бәәсмн. Тегәд сохр Исаак көвүнә һар илхләрн мекнь медчкх гиһәд, Ревекка Иаковин күзүһинь болн һаринь ямана ишкин арсар бооһад өгв. Иаков белдсн хот авад, шатрт орад эцкдән келв:

- Эцк мини, би эн бәәнәв.

Исаак толһаһан өндәлһәд сурв:

- Чи кембвч?

Иаков шүлсән зальгн келв:

- Би Исав, тана ууһн көвүмб. Тана сурсиг би цугтнь күцәвв. Эн хот идәд нанд әдсән өгтн.

Исаак соңсад... Исавин дун энүнд акад болҗ медгдв.

- Нааран өөрд, би чамаг бәрҗ үзнәв, - гиҗ эцкнь келв.

Иаков әәчкв, маңнаһаснь көлсн асхрад бәәв. «Эцкм ода мини мек медчкхлә яахмб?» - гиһәд эн ухалв.

Исаак көвүһәд илҗ үзв, зуг терүнә һарнь ямана арсн күртл күрч.

- Акад юмн, дунь болхла Иаковин дуута, болв һарнь Исавин һарин бәәдлтә.

Чи үннәр мини Исав көвүмбч? - гиҗ Исаак сурв.

- Э, э, энтн бив! - гиҗ Исаак келв.

Эцкнь хот идәд, көвүһән дуудв:

- Көвүм мини, нанур өөрд, намаг үмслч!

Иаков өөрдәд эцкән үмсхлә, эцкнь Исаавин хувцна үнр авад, ууһн көвүһән үнндән гиҗ санад келсмн:

- Чамас Бурхн маднд өгнәв гисн өргн тегш һазрин каңкнс үнр һарчана. Нанур өөрдәд, өвдгдләд зогс.

Иаков эцкинь кевтсн орна өмн өвдгдләд зогсв.

Исаак һаран көвүнәннь толһа деер тәвв. Дарунь ик байртаһар келсмн:

- Бурхн чамд һазрин дала урһц болн олн мал өгтхә. Талдан келн әмтнә улс чамд заргдтха. Чамаг харасн күн эврән харалла харһхтха. Чамд әдс өгсн күн эврән әдстә болтха.

Иаков шатрас һарад йовхла, Исав кеерәс хәрҗ ирсмн. Исав эцкүрн орҗ ирәд, келв:

- Би танд хот белдҗ авч ирв. Та нанд әдсән өгтн.

- Юн болҗана? Чи кембвч? Кенд би ода әдсән өгүв?

Тиигҗ цугинь ил болсмн.

Исав хәәкрәд уульв:

- Иаков намаг хойрдад меклчкв! Түрүләд эн мини ууһн көвүнә зөв булаҗ авла! Ода болхла эцкин әдс авчкв! Эцк мини, та нанд бас әдсән өгтн!

Исаак келв:

- Уга, көвүм мини. Бурхн өгчәх онц әдс би зуг ууһн көвүнд өгч чадҗанав. Чамд би бас әдс өгчәнәв, зуг та хойрас чи түрүңкнь болшгоч.