Бурхна үгән өгсн көвүн

Авраам Сарра хойр Ханаана һазрт шатр дотр бәәв. Эднд төрүц үрн уга билә. Авраам Сарра хойр көгшн улс билә. Авраам тер цагла зун наста билә, Сара – йирн наста бәәҗ.

Нег сө Бурхн Авраамд келв:

- Теңгр тал хәлә. Чи ю үзҗәнәч?

Теңгр оддудар бүркәтә билә, оддуд то-томҗ уга билә. Тегәд Бурхн келв:

- Чини хөөт үйнрин улс тооһарн теңгрин оддуд мет олн болх. Тедн Ханаана һазрт бәәх. Тенд бәәсн килнцтә улс тер һазрас көөгдх.

Авраам үрн уга болвчн, зуг эн Бурхн келсн үгән күцәх гиҗ иткв. Авраам Бурхна үгинь соңсдг төләднь Бурхн терүнд дурта билә. Юңгад гихлә Бурхна келсн үгд иткдг бәәсмб. Юңгад гихлә Бурхн оньдин үн келдг болн келсән күцәдг бәәсмн.

Нег дәкҗ Авраам шатриннь өөр суула. Үдин цаг өөрдҗ йовсн кем билә. Генткн Авраам шатр талнь өөрдәд аашсн әмт үзв. Тер улсиг Авраам гүүһәд тосч, һазрт күрч мөргәд келв:

- Күндтә гиичнр, мини шатрт орад, көлән амратн, көлитн уһах ус ода авч ирх. Би таднд хот авч ирнәв, невчкн чидл урһаһад, эврәннь хаалһар цаарандан йовхит.

Һурвн гиич Авраамин шатрт амрхар зөвшәлән өгв.

Эн Авраамин шатрур ирсн гиичнрин тускар тадн ю ухалҗанат? Альдас ирсмб, ямаран улсви? Эдн Бурхна Элчнр теңгрәс бууҗ ирсмн. Бурхн эдниг Авраамд байрта зәңг авч ирхин төлә илгәсмн. Бурхн зәрмдән Эврәннь заавран әмтнд күргхин төлә Эврәннь Элчнрән илгәнә.

Бурхна Элчнр шатрин өөр модна сүүдрт суув. Сарра шатр дотр бәәҗ. Авраам Саррад келв:

- Сән гидг һуйрар шулуһар өдмг болһ.

Дарунь Авраам гүүҗ одад маласн сән гидг туһл бәрҗ авад, зарцдан келв:

- Хот шулуһар белд.

Авраам бийнь Элчнрин өмн мах, өдмг, ээзгә, үс тәвнә. Тедн хотан эдлтл, Авраам өөрнь модна сүүдрт зогсв.

Теднәс негнь Авраамас сурв:

- Сарра авальчнь альдв?

- Шатр дотр бәәнә. - гиҗ Авраам келв.

Тиигхлә тер Элч келв:

- Җил болад эн цагла би хәрү чам тал ирхв. Сарра көвүтә болх.

Сарра Элчин үгмүд соңсчкад, итксн уга. Юңгад гихлә Сарра бийән дегд көгшн гиһәд, дотран инәв.

Тер Элч келв:

- Юңгад Сарра инәҗәхмбч? Сарра йосндан көвүтә болх! Деед Эзн Бурхнд күцәҗ болшго юмн бәәхий?

Элчнр цааранднь эврәннь хаалһар йовхар босв. Авраам тедниг үдшәһәд, хәрү шатрурн ирв.

Бурхн Эврәннь келсн үгән күцәхий? Аль мартхий? Уга, Бурхн келсн үгән төрүц мартшго. Тиигҗ Бурхн келсән күцәһәд, Сарраг хәәрләд, көвү өгв. Җил болад Сарра Авраамд көвү һарһна. Нилх көвүндән Исаак гидг нер өгч. Авраам Сарра хойр ик байрта, кишгтә бәәцхәв. Олн җилин насни туршин санаһинь Бурхн күцәв! Бурхн келсн үг йир бат. Исаак өсәд-босад, эк-эцкән тевчдг, теднә келсн үгинь соңсдг көвүн билә, Бурхн энүнд дурта бәәсмн.

Тиигҗ Бурхн Авраамд өгсн үгән күцәв. Авраам Сарра хойр көвүтә болх гиҗ Бурхн келсмн. Бурхн үгдән бат, келсән күцәдг төләд Авраам Сарра хойрт көвү өгв. Зуг Авраам бийнь Бурхнд дурта бәәсндән, әрүн седкләрн Бурхна келсн үгмүдинь күцәдг билә. Тер учрар Авраамд тернь туста болн сән болв.

Бурхна келсн үгд иткх кергтә. Деед Эзн Бурхнд күцәҗ болшго юмн уга!