Иаковин зүүдн

- Чамд эднәс һарч зулх кергтә! - гиҗ Ревекка Иаковиг эрҗ сурв.

- Ууртан бүтсн Исав Иаковиг алхар седҗәнә, - гиҗ Ревеккад зарцнриннь негнь келҗ.

- Мини ах Лаванур, наһц аав Авраамин төрсн һазрур йов. Кемр энд чамаг уга болхла, цөн җил болад ахинчн уурнь тәвгдх. Тер цагт би чамаг дуудулнав, тегәд чи хәрү ирҗ чадхч.

Аваль Исаакд Иаков көвүһән тәвхин төлә юн гиҗ келхән Ревекка эртәснь медҗәлә.

- Иаковд Бурхнд иткдго күүкд кү буулһҗ болшго, энүнд Бурхиг меддг гергн кергтә.

Исаак энүнлә зөвшәрв. Энүнә бийиннь гергн Ревекка олн җил хооран Авраамин төрскн һазрас ирсмн. Иаков тендәс бас бийдән герг олҗ авг.

Исаак Иаковиг бийүрн дуудв.

- Иаков, көвүн минь, эн һазрас бийдән герг бичә ав - гив эцкнь. - Харран тал йов, экиннь төрсн һазрур од. Тенд бийдән герг олҗ авхич. Бурхн чамд әдс өгтхә!

«Эннь сән, - гиҗ Иаков санв. - Эцкм бийнь намаг йовулҗана, би Исавас иигәд бултҗ чадхв, мини эн йовлһн зулад гүүсн биш болх».

Эн эк-эцктәһән, элгн-садтаһан мендләд, һарад йовв.

Иаков эцкәсн хаалһдан авх юм ас гиҗ сурсн уга. Эн бийтәһән зарцнр чигн, ямад-хөд чигн, нег ээлҗһ чигн авсн уга. Хаалһд һанцарн һарад йовв. Иаков гейүртәд бәәв. Эн зуульчлҗ йовх эгл угатя күүнә бәәдлтәһәр, эн насндан үзәд уга хол һазр орад йовв. Хаалһдан Иаковд унтдг шатр чигн, гер чигн уга, тегәд сө болхла, эн толһа доран нег чолу тәвәд, нүцкн һазр деер кевтәд унтв. Тер һазрт әәмшгтә зерлг аңгуд бәәсмн, болв Иаковиг хаалһднь Бурхн хәләҗ йовв.

Иаков седклдән зовлңта йовхиг медәд, нөөртнь сәәхн илвтә зүүд орулв.

Зүүдндән эн һазрт зогсчах, ораһарн теңгрт күрчәх давшур үзв. Терүгәр деегшән-дорагшан олн Бурхна Элчнр йовад бәәцхәнә. Деер Бурхн зогсчана. Эн Иаковд келв:

- Би Деед Эзн Авраам болн Исаакта күүндләв. Чини кевтсн эн һазриг би чамд болн чини хөөт үйнрт өгнәв. Хөөт үйнрчн йир олн болх. Теднәр дамҗад һазрин цуг келн әмтнд мини әдс өггдх. Би чамла бәәхв, Иаков, альд чи йоввчн, би чамаг хәләһәд йовхв.

Энүндән Иаков серәд бәәв: «Эн йирин зүүдн биш, - гиҗ эн санв. Эн һазрт Бурхн биийнь бәәдгч! Эн нанла күүндв!»

Иаков дерләд унтсн чолуһан авад, бумблв мет тәвв. Дарунь эн экләд мөргв:

- Бурхн, кемр Чи намаг эн ут, әәмшгтә хаалһд үкүллго, әрүл-менд хәрү йовулхла би цуг җирһлин туршарт Чамд церглхв. Чи нанд өгснәсинь арвн хүвинь би хәрү чамд өгхв.