Иисусиг кирст хадлһн

Кирст хадтха гиһәд цааҗлгдсн, Иисусиг болн йос эвдсн хойр деермчиг римин цергчнр хәәкрәд, маляһар көөһәд йовҗ.

Теднә ардас дала әмтн дахсмн. Эдн Голгофа эс гиҗ Маңнан орм гидг нертә һазрур ирв. Энд римин йосар деермчнриг кирст хаддг бәәҗ. Дәкәд зарһд орсн улсиг цокдг бәәсмн болн эдн нурһн деерән кирсән авч йовх зөвтә билә. Тегәд Иисус модн кирс нурһн деерән авад йовсмн.

Хаалһин өрәлднь Терүнә чидлнь чиләд бәәв. Иисусин кирс талдан күүнд авч йовтха гиҗ цергин ахлач закв. Тер күүнә нернь Симон Киринеянин. Иисусиг дахч йовсн олн әмтнә дунд Терүнә зовлңгинь үзәд, уульсн күүкд улс билә.

Цааҗлдг Голгофа ормур ирәд, салдсмуд аврлт уга көдлмшән кев: һазр деер кевтсн кирст Иисусиг хадв. Эдн нүк малтад, дотрнь кирс тәвәд батлв. Хойр деермчнрлә бас тиигҗ кев. Теднә негнәннь кирс Иисусин барун бийднь, наадкнь зүн бийднь хадсмн.

Иисусиг дахад эн ормур цөөкн Терүнә үүрмүд-залус болн күүкд улс ирцхәҗ. Күүкд улс уульлдад бәәсмн. Теднәс хол биш зогссн улс Иисусиг яһҗ зоваҗахинь хәләһәд, инәлдәд, Терүгәр наад бәрәд келцхәҗ:

- Кемр Чи Бурхна көвүн болхла, эврән Бийдән нөкд болад, кирсәс бу! Тиигхлә мадн Чамд иткхувидн!

Иисусин хаҗуд кирс деер өлгәтә деермчнрин негнь Терүг му келҗ. Наадкнь болхла өөркән хөрәд келсмн:

- Тагчг бол! Бидн зөвтә цааҗла харһвидн! Эн болхла му юм кесн уга!

Дарунь тер деермч Иисусур хәләһәд иигҗ келв:

- Деед Эзн, Бурхна орн-нутгт ирхләрн мини тускар саныч!

Иисус терүнд хәрү өгв:

- Эндр өдр чи Нанла хамдан таралңгин орнд тусхич гиҗ Би чамд үгән өгчәнәв!

Терүнә хөөн генткн эргндк һазр харңһурв. Һазр чичрв.

Иисусин цогцин зовлң сүркә догшн билә, зуг Терүнә седклиннь зовлңгинь терүнәс даву күчр бәәсмн. Делкән цуг улсин килнциг Тер дааҗасмн. Сүркә, тесҗ болшго зовлңгиг цөөкн частан Иисус һанцарн дааһад, бәәсн чидлән һарһад келсмн:

- Бурхн Мини! Бурхн Мини! Юуни төлә Намаг үлдәсмбч?

Делкән цуг әмтнә килнцәс көлтә Теңгрин Эцкин догшн цухл Бий деерән дааҗахан Иисус медв. Эн цухлыг нег чигн килнцтә күн дааҗ чадшго. Һанцхн Христос, Бурхн болн Күн, чадх билә.

Тәгәлңгдән герлтв, Иисус Эврәннь сүл үгмүдән келв:

- Күцгдв! Аав Мини, Чини һарт Эврәннь әмән бәрүлҗ өгчәнәв.

Эн үгмүдин хөөн Иисусин әмнь һарв. Терүнә толһа өрч деернь унв.

Тер асхн Пилатур Аримафеинәс ик байн, нертә күн Иосиф ирәд, Иисусин цогциг кирсәс салһад, иудей улсин авъясар оршах зөв сурв. Иосиф Иисуст дурта билә, зуг иудеймудас әәһәд, терүгән нуудг билә. Римин цергин ахлач зөвән өгч.

Сөөһәр Деед Эзнүр ирсн, хөөннь эн Иисусин ардас нуувчар дахҗ йовдг күн Никодим бас ирәд, Иосифд нөкд болв. Эн үнтә эд, каңкнсн сәәхн үнртә тос - цуг иудей улсин оршалһнд кергтә юм авч ирсмн. Иисусин цогцинь эдәр ораһад, каңкнсн сәәхн үнртә тос түрксмн. Кирст хадсн һазрин өөр бәәсн хад дотр нег шин оршалһнд Иисусин цогциг тәвсмн. Оршалһнур ордг үүднь ик чолуһар хааһад, хәрҗ ирцхәҗ.

Маңһдуртнь бурхна гелңгүд болн фарисеймуд Деед Эзнә келсн үгиг санҗ ухалв. Деед Эзн иигҗ келсмн: «Һурвдгч өдртнь Би әмдрхв». Тегәд эдн Пилатур гүүҗ одад, Иисусиг оршасн ормд харул тәвх цергчнр сурцхаҗ. Сурһульчнринь сөөһәр ирәд, цогцинь хулхалад, дәкәд әмтнд Тер әмдрв гиҗ келх гиһәд әәцхәҗ. Пилат теднлә зөвшәрәд, цергчнр өгч. Дәкәд эдн оршалһнд нег чигн юмн бичә ортха гиһәд, терүнд тииз тәвцхәҗ. Тиигҗ закана улс өңгрсн Иисусин цогцд харул тәвсмн. Юңгад гихлә Иисусас көлтә бичә му юмн болтха гиһәд кеҗ.