Иисус Пилатын өмн

Маңһдуртнь өрүн эрт салдсмуд Иисусиг Пилат гидг нертә, Римин императорин ахлачур авч ирв. Пилат Иисусиг цааҗла харһулх эс гиҗ сулдхад тәвх шиидвр авх зөвтә бәәсмн. Терүнә бәәшңгин өмн дала әмтн хурсмн. Пилат хурсн әмтнд чаңһар келв:

- Эн Күн үкллә харһулх гем һарһсинь би үзҗәхшв. Тегәд Энүг цааҗла харһулчкад, сулдхтн гисн заквр өгхүв.

- Уга, уга! Кирст хад, кирст Иисусиг хад, - гиһәд әмтн хәәкрлә.

Ода тиигхләнь Пилат ю кех бәәсмб? Әмтн Иисусиг алх шиидвр Пилатас некҗәнә. Зуг Иисус буру юм эс кесиг Пилат лавта медәд, Иисусиг сулдхх арһ хәәһәд бәәҗ. Тер агчмд терүнд иим ухан орв: «Еврей улст Пасхин сән өдрлә түүрмд суусн улс дундас негинь сулдхх авъяс билә. Кемр би теднд кү алсн Варавва болн Иисус хойрас негинь шүүҗ автн гихлә, тедн Иисусиг шүүҗ авх болвза?». Тегәд Пилат хәәкрв:

- Эн җилин Пасхин өдрлә таднд кенинь Варраваг эс гиҗ Иисусиг сулдхҗ тәвхмб?

- Варавваг, Варавваг, Варавваг! - гиһәд әмтн хәәкрв.

Эн хәәкрлһн бәәшңгин дотрк хашад соңсгдв. Тенд римин салдсмуд Иисусар зооган кеһәд, Терүг зоваһад, догшнар цокад, наад бәрәд бәәцхәҗ. Эдн Иисуст хан күн өмсдг улан өңгтә лавшг ээм деернь хаяд, толһа деернь хатхдг көглин ацмудар гүрсн титм тәвцхәҗ. Зооган келдәд, чаңһар хәәкрлдәд бәәҗ:

- Байрл, Иудей әмтнә хан!

Дәкәд салдсмуд Иисусиг цусн һартлнь цевәр цокцхав.

Иисус эн цоклһ, зовалһ, наад бәрлһ тагчг, үг келлго даасинь әмтн үзәд, Терүнд санань зөвх гиҗ Пилат нәәлҗәсмн. Тегәд эн Иисусиг хәрү әмтнә өмн зогсав. Зуг нег чигн күүнә санань Иисуст зовсн уга. Әмтн хәәкрәд бәәв:

- Энүг кирст хад! Энүг кирст хад!

Тиигхлә Пилат яахан медлго, арһнь тасрв. Тегәд эн һаран уһах ус авч иртн гиҗ закад, олн әмтнә өмн һаран уһаһад иигҗ келсмн:

- Эн Үннч Күүнә цусн асхрснд мини гем уга. Эврән медцхәтн! Би Терүг кирст хадх заквр өгв, зуг һарһсн гемиг тадн даахд!

Эн әмтнә некврәр Вараввиг сулдхв, римин цергчнр болхла цааранднь Иисусиг зоваһад бәәсмн.