Пётрин цөкрлһн

Басңг өдр эклв. Иисусиг Каиф гидг Бурхна гелңгүр авч ирв. Иисусас сурлһ авхар болн терүнд шиидвр өгхәр, терүнә герт Деед йосна зарһ кедг улс цуглрҗ.

Петр Багшиннь ардас йовҗ йовла. Эн Иисусин зарһ кеҗәсн герин хашад медмҗән угаһар орв. Киитн болад, салдсмуд болн зарцнр герин хаша дотр һал шатаһад, терүнә өөр дуладв. Пётр теднә өөр бас суув.

- Чи бас эн Иисусин сурһульчнрин негнч, аль би эндүрҗәнәв? - генткн күүкд улсас негнь терүнәс сурв.

- Уга-уга, - Петр адһҗ келв.

Тиигәд эн түрүн болҗ Иисусас цөкрв. Болв одахн күртл Танас цөркшгов гиҗәлә.

Нег цаг давсна хөөн Петр дәкәд хашад орад һалур өөрдв. Тер зарһ болҗах цагла Багшлань юн болҗахинь эн цугтаһинь үзсн, соңссн билә. Әмтн дунд бултад, эн синедриона шиидвриг күләхәр седв. Невчкн зуур бәәҗәһәд зарцнрин негнь Петр тал хәләчкәд келв:

- Чи терүнлә биләлчм?

Петр бурушав:

- Иисусла? Терүг би төрүц медҗәхшв!

Тиигәд эн хойрдад Деед Эзнәс цөкрв.

Эн цагла зарһин хорад ик шууган һарв. Иисусиг түлкәд, наад бәрәд, зәрмснь энүг цокад бәәв.

Энд дәкн нег күн Петрт келв:

- Чи мел теднәс негнь. Чини дууна айлт медүлҗәнә.

Яһҗ терүнә Багшиг аврлт угаһар зоваҗахиг цугтаһинь үзәд, Петр бийән тиим учрас гетлгхин төлә келв:

- Эн Иисусиг би медгов!

Өрүни эр така хәәкрв.

Тиигхлә Петр «Эр така һурв дәкҗ хәәкртл, чи нанас цөкрхч!» - гиҗ Деед Эзнә Пасх өдрин асхн келсн үгмүдиг тодлҗ санв. Деед Эзнәс цөкрсн Петр, Багшурн хәләһәд Багшинь бас терүнүр хәләҗәхинь үзв.

Ичр болн зовлң Петриг эзлв. Һашутаһар ууляд, хашаһас һарад зулв.

Багшин хәләциг ода кезәд чигн эн мартч чадшго.