Иисусин бәрән

Садын өөр дала улс цуглрв. Әмтн шачах модна заляр хаалһан герлткв. Деермчиг болн алачиг бәрҗ авхар седсн мет, тедн үлд болн җид һартан бәрсн ирцхәв. Теднә ик зунь бурхна гелнгүдин болн фарисеймүдин мухлас бәәҗ. Болн Иуда, сурһульчнрин негнь, тедниг толһалсн билә.

- Кениг тадн хәәҗ йовнат? - гиҗ Иисус сурв.

- Назарет балһсна Иисусиг, - цуглрсн улсас иим хәрү ирв.

Иисус келв:

- Эннь бив.

Урдас Иуда Иисусиг бәрҗ авхар бәәсн әмтнлә күүндәд үгцлҗ. Эндү һарһшго төләд би Багшиг үмснәв. Эн докъяһар тадн кениг бәрхән медхт.

Иуда Иисусур өөрдәд ирхләнь, теднь арһул келв:

- Намаг үмсәд бәрүлҗәнч, Мини иньг?

Иим үгмүд Иудын зүркиг хатхв, болв эн Иисусиг үмсв. Тер цагла нег агчмд мухлас Иисусиг шүүрәд бәрәд авчкв.

- Юңгад тадн Намаг сөөднь авчахмт? Би өдр болһн сүмд бәәһә бәәтл, тадн Намаг авдго биләт, - гиҗ Иисус келәд, теднәр Бийән боолһулв.

Сурһульчнр Багшинь бәрәд авчасинь үзчкәд, әәһәд гүүҗ одцхав.

Хортд Иисусиг Иерусалимур авч ирв. Тенд эн үклин цааҗла харһх.