Гефсиманск садт

Иерусалимин шидр бәәсн Кедрон урсхлын талдан захд Иисус арвн негн сурһульчтаһан ирв. Арвн хойрдгчнь, Иуда, эднлә уга билә.Харңһу сөөһәр эдн Елеонск уулур темцв. Энд Иисус Эврәннь Теңгрин Эцкд даңгин зальврдг бәәсмн.

Уулын девсңд Гефсиманск нертә сад билә. Энд олив модд урһдг бәәсмн. Садт орхин өмн Иисус сурһульчнртан келв:

- Энд сууҗатн, Би тенд зальврнав.

Петр, Иаков, Иоанн һурвнд бийинь дахтха гив.

Эн саамд Энүнд йир амр биш билә. Деед Эзн һундлта болн уудьврта йовла. Терүнлә юн учрхиг Эн меддг бәәсмн. Әмтнә килнциг Эн даадг билә. Учрх күнд зовлңгин болн үклин өмнәс Иисус йовв. Энүнә цогц күчр өвдкүр эдлх бәәсмн, болв хамгин түрүнд сәкүснә тесҗ болшго зовлң эн тесх бәәсмн. Килнц уга Эн күмн әмтнә килцин төлә цааҗлгдх зөвтә бәәсмн.

Зовлңдан даргдсн Деед Эзн эңкр сурһульчнртан иигҗ келв:

- Мини седклм ик гидгәр зовҗана. Энд мини өөр бәәтн!

Ямр нег күүнлә әдләр Иисуст үүрмүдиннь дөң кергтә билә, хамдан зальврий гиҗ эдниг сурв. Нег цөөкн алхмд эднәс заагрчкад, өвдглҗ сууһад, чирәһән һазрт күргҗ унад зальврв.

- Эцк минь! Кемр тиигҗ болхла, эн зовлң нанас гетлтхә; келхд, Мини седвәрәр биш, Чини седсәр болтха.

Ямр нег күүнлә әдләр Деед Эзн учрх зовлңгас гетлхәр седлә. Зуг Эврәннь Эцкән соңсдг Көвүн болсн төләдән Эн келв:

- Мини седкләр биш, Чиниһәр болтха.

Цусна дусал мет һазр деер көлс асхрулҗ, һундлта Иисус зальврв. Тиигҗәхлә теңгр деерәс Бурхна Элч бууҗ ирәд, Энүг дөңнв.

Зальврлһан төгсәчкәд, Иисус һурвн сурһульч талан ирв. Нанла хамдан зальвртн гиҗ Эн тедниг сурсн билә. Тедн болхла зальврҗ уга, унтад кевтҗ. Тедниг серүлчкәд, Петрт эн келв:

- Симон! Чи унтнчи? Негхн час нанла унтлго бәәҗ чадсн угач.

Иисус тиигҗ келхләрн, кезә нег цагт Симон Петр би Чамла үкхүв, Чамас кезәд чигн цөкршгов гисн үг өгсиг терүнд тодлулхар седлә. Дәкәд хойр дәкҗ Иисус нанла хамдан зальвртн гиҗ сурһульчнран сурв. Хойр дәкҗ эдн тал ирхләрн, унтад кевтхинь Эн үзв. Һурвдад ирхләрн, Эн келв:

- Тадн ода күртл санамр унтад кевтцхәнт? Мини цаг ирв: Күмни Көвүн килнцтә улсин һарт өггдҗәнә. Бостн, йовцхай: Намаг бәрҗ өгхәр цаг өөрдҗ ирв.