Сүл Пасх

Израилин келн улсин төлә Пасх хамгин чинртә байр билә. Эн саамд Иисус сурһульчнртаһан хамдан байриг давулхар седв.

- Тадн Иерусалимд ирсн цагт донҗг авч йовх күн харһх. Терүнә ардас гер күртлнь дахад, Пасхан байриг альд нәәрлҗ болх, гиҗ суртн. Эн ик хора үзүлх, терүнд тадн цугинь белдҗ чадҗанат, - гиҗ Петр Иоанн хойрт Иисус келв.

Иисусин келсәр, сурһульчнрнь цугинь күцәв.

Асхн эдн Иерусалимин нег герин ик хорад цуһар хурв. Энд Иисус байрин авъяст тас ордго үүлдвр күцәв. Иисус нүр-һаран уһадг сав авад, ус кев. Нег сурһульчиннь өмн чөкләд суучкад, көлинь уһав. Негнәннь көл уһачкад, хойрдгчиннь, һурвдгчиннь…

Алң болсн сурһульчнрин нүдднь икдәд-икдәд йовна. Ямаран учрта йовдл эн? Байн улсин гермүдт гиичнрин көл уһадг зарцнр бәәдг. Болв Иисус зарц бишлм! Эн Багш, Бурхна Көвүн билә!

Чеерүд Петрт өөрдхлә, эн бурушаҗ:

- Деед Эзн, Чи мини көлим кезәд чигн уһашгоч! - гив.

Иисус терүн тал хәләчкәд келв:

- Кемр чи нанд көлән уһах зөв эс өгхлә, чи Мини болшгоч.

Нег агчмд Петр ухалв. Энтн йирин көлинь уһалһна төр биш, гүн утхта үүлдвр. Иисус эн үүлдвриг учр-утхтаһар күцәсмн.

- Би таднд ю кесиг медҗәнт? - гиҗ Тер сурв.

Сурһульчнрнь тагчг, юңгад гихлә эн йовдлын учринь эдн медгдсн уга.

- Би таднд үлгүр үзүлүв, - гиҗ Иисус цәәлһв, - тадн бас тиигҗ кетхә гисн үлгүр.

«Бас тиигҗ кехмб? Зарцнрт хүврхмби? Болв Иисус маднас терүг некҗ чадшголм!» - гиҗ сурһульчнрнь санв.

- Тадн Намаг Багш болн Деед Эзн гиҗ нерәднәт. Чик келҗәнт, юңгад гихлә би йосн Багш болн Деед Эзн. Зуг тиим болв чигн, Би тадна көлитн уһаһув. Кемр Би тиигҗ кеҗ чадсн болхла, тадн нанас давуһар кех зөвтәт.

Ода асхн хотан чигн ууҗ болҗана. Сурһульчнр хот авч ирәд, Иисус зальврхиг күләцхәв. Болв зальврхиннь өмн Иисус дәкәд нег сурһульчнран алмацулв, даруһас ирх Эврәннь үклин тускар теднд келв. «Цуһар намар наад бәрх, Би цокулхув, цааҗлгдхв. Болв һурв хонад, Би әмдрхүв.» - гиҗ Иисусин келснднь сурһульчнрнь икәр һундрхв. Деед Эзн цааранднь келв: «Зовлң эдлхәсн урд эн Пасхан байриг Би таднла давулхар седләв. Юңгад гихлә дарук байриг Би шин орчлңд, Бурхна Орн-нутгт, нәәрлхүв».

Тиигҗ келчкәд, Иисус өдмг авч зальврв. Өдмгиг хуһлад, сурһульчнртан өгв.

- Энтн Мини Цогц, - гиҗ Эн келв. - Эн өдмг хуһлгдснла әдләр тадна төлә Мини Цогц хуһлгдх. Мини санлыг тевчҗ, бас тиигҗ кетн.

Хотан эдлчкәд, Иисус бийдән чаһр кеһәд келв:

- Энтн болхла тадна төлә асхрҗах Мини Цусн. Энтн Бурхн әмтнлә батлҗах шин бооцан.

Чаһрта ааһиг Эн өөрән суусн сурһульчдан өгв, наадк сурһульчнрнь чеерүдәр терүнәс ууцхав.

Асхни хот уулһн төгсхдән өөрдҗ йовла. Эн Пасхан байр урднь болсн байрмудла әдл биш билә. Учрҗах юмна зуг зәрм тоотынь сурһульчнрнь медсн билә. Болв удан цаг боллго, сүл пасхальн асхни хот уулһна йовудт Деед Эзнә келсн үгин учр-утхинь эдн медцхәх.