Вифанийд Иисуст әрүн тос түркснә тускар

Пасх болхас зурһан өдр өмн Иисус сурһульчнртаһан Вифанийд ирв. Эн, авъяст тохрсар, Марфа, Мария, Лазарь һурвна герт ирв. Маңһдур асхнднь эдн цуһар урднь Иисус хальдврта арсна гемәс эдгәсн Симонур гиичд ирв.

Асхни тооврин йовудт Марфа гиичнрт хот-ундынь кеҗ өгчәлә. Тиигҗәхлә Мария босад, сәәхн каңкнсн үнртә тос (үнтә тос) авад, Иисусур өөрдв. Тоста савин бөгләг болһамҗтаһар секәд, Иисусин толһа, көл деер кев. Тиигчкәд күклән цуцад, үсәрн Иисусин көл арчв. Сәәхн каңкнсн үнртә үнтә тосна үнрәр гер дүүрв.

Суусн зәрм әмтн Марияд ур күрв. Үнтә тос тиигҗ үрәҗәнә гиҗ эдн хармнцхав. Хөөннь Христосиг бәрҗ өгсн Иуда Искариот келв:

- Юңгад эн каңкнсн үнртә әрүн тосиг һурвн зун цаһан мөңгәр хулдад, угатя улст түгәҗ эс болна?

Эн угатя улст сана зовад биш, бийнь хулхач бәәсн учрар тиигҗ келсн болдг. Иисуст әмтн бәрц бәрсн мөңгтә яршгиг Иуда хадһлдг билә, тер мөңгнәс эн бийдән үлдәҗ авдг бәәсмн.

Уурта бәәсн сурһульчнран Иисус хөрҗ, чаңһар келв:

- Мария мини туст сән йовдл күцәв. Угатя улс даңгин тадна өөр бәәнә, Би болхла хая нег таднла бәәдүв! Сән Зәңг келсн цуг орчлңд мини төлә кесинь цуһар тодлҗ йовх!