Авраам Лот хойр

Цаг давад Авраам Лот хойр йир байн болцхаҗ. Тедн дала бод болн үүрмг малта, цаһан мөңгтә болн алтта болв. Зуг теднә хөөчнр хоорндан цүүглдәд-керлдәд бәәсмн. Юңгад гихлә малмуднь дегәд дала болад, һазрнь баһдад бәәҗ.

Тегәд Авраам Лот ачдан келв:

- Чини болн мини хөөчнр дунд керлдән бичә болтха. Бидн хоорндан элгн-саднвидн. Ода ма хойр нег-негнәсн салхмн. Чи нанас сал. Һазр дала бәәнәлм. Кемр чи зүн үзг тал йовхла, би барун үзг тал йовнав. Кемр чи барун үзг тал йовхла, би барун үзг тал йовнав.

Тиигәд Авраам Лотд бәәрлх һазр шүүҗ авх зөв өгв. Лот эргндк һазр хәләһәд, Иордан һолын көвәһәр бәәсн эн тегш һазр ик урһцтаһинь үзв. Эн һазр Деед Эзнә сад таралң мет гиҗ Библь дегтрт бичәтә. Тегәд Лот эн үлү гидг сәәхн һазр шүүҗ авсмн. Лот мел һанцхн бийиннь тускар ухалдг бәәҗ. Зуг Содом Гомора балһсдт бәәсн һазрт, һалзу, килнцтә улс бәәҗ. Теднәс көлтә хойр эн балһсиг Деед Эзн Бурхн уга кехәр бәәсинь Лот медсн уга билә. Юңгад гихлә Лот Бурхиг күндлдг болв чигн, зуг хар саната, ичр-һутр уга улс дунд бәәҗ болхмн гиҗ тоолдг бәәсмн.

Цаг давв. Нег дәкҗ Деед Эзн Авраамд келв:

- Содом болн Гомора балһснд бәәдг әмтн дегд ик килнц һарһҗана. Би тедниг уга кех санатав. Зуг эн балһсдын һалзу, килнцтә улсиг сүркә иим цааҗллһнла харһулхин өмн Би Эврән тедниг одад шинҗлнәв.

Бурхн хойр Элчән Содомур илгәсмн. Авраам болхла Бурхнас сурсмн:

- Кемр Содом балһснд үннч тәвн күн бәәхлә, Чи эн балһсиг тер үннч тәвн күүнә төлә хәәрлхвч?

«Кемр Содомд Би үннч тәвн кү олҗ авхла, теднә төлә эн балһсиг хәәрлнәв». - гиҗ Деед Эзн Авраамд келв. «Болв Авраам үннч улсин тооһинь баһрулад: 45, 30, 20 болн 10 күртл тиим әмтн бәәхлә, Чи теднә төлә, Деед Эзн, балһсиг хәәрлхвч?» - гиһәд дәкн-дәкнәс сурад бәәв. Авраам кедү дәкҗ сурсн бийнь, Деед Эзн үгән өгәд келсмн: «Арвн үннч күүнә төлә чигн Би балһсиг уга кешгов!»

Асхн болад ирхлә, тер хойр Бурхна Элч Содом балһснур ордг ик үүдн тал өөрдәд ирҗ. Тер цагт иим үүднә өөр күндтә, нертә улс суудг авъяс бәәдг бәәҗ. Лот тенд бас суудг бәәҗ. Балһснур аашсн улсиг Лот үзн, шулун гидгәр босад, һазр күртл гекҗ тедниг тосна. Эн теднд мини герт орад, хонад һартн гиҗ үрвр кенә.

- Уга, бидн һаза хонхвидн. - гиҗ тедн келв.

Зуг Лот Содом балһсна әмтн күүнә һазрас ирсн улст му юм кедгинь меддг бәәсмн. Тегәд Лот эврәһәрн болһв. Тедн Лотыг дахад, герүрнь йовна. Теднд Лот бийнь хот белдв. Зуг асхни хотан гиичнр ууҗ дуусад уга бәәтл һазаһас әәмшгтә шууган соңсгдв. Эннь балһсна әмтн гүүҗ ирцхәҗ. Эдн Лотыг ирсн улсан һазаран һарһ гиҗ некв. Зуг Лот гиичнрән харсҗахинь үзәд, тедн терүнд уурлад, чамас бидн бас өшәһән авхвидн гиһәд хәәкрлдәд бәәцхәсмн. Бурхна Элчнр цуг эн улсиг сохрулад Лотд келв:

- Шулуһар эврәннь өрк-бүлән эн балһснас авад һар. Эн һалзу килнцтә улсин тускар Деед Эзн медв. Тегәд эн балһсиг болн энд бәәсн улсиг, теднә килнцәс көлтә Деед Эзн уга кетн гиҗ маднд даалһвр өглә. Эн балһснас һарад гүүтн: Деед Эзн балһсиг уга кехәр бәәнә!

Һундл төрхд, Лотын күргд терүнднь итксн уга, наадлҗана гиҗ санцхаҗ. Лот бийнь бас һарч гүүхәр адһҗасн уга билә. Тиигхлә Элчнр терүг, терүнә гергиг болн хойр күүкинь һараснь авад, балһснас һарһв. Юңгад гихлә Деед Эзн тедниг хәәрлхәр бәәсмн. Элчнрин негнь эднд иигҗ келв: «Шулуһар эндәс гүүҗ һартн! Бичә ардан хәләтн». Зуг Лотын гергнь Бурхна келсиг соңссн уга. Тер ардагшан балһснур хәләхләрн, дор ормдан давста бахн болҗ оч. Лот болн терүнә күүкднь ардан хәләлго, хурдар балһснас һарад гүүҗ.

Тегәд Деед Эзн теңгр деерәс Содом Гомора хойр балһснур күкр болн һал асхв. Эн балһсдыг, өөрнь бәәсн Иордана тегш һазриг болн цуг әмтә-тоотаг Бурхн уга кев. Урднь сәәхн чигн тегш һазрин орм өдгә цагт «Үклин теңгс» гиҗ нерәдгднә. Библь дегтрт болхла тер ормиг Давста теңгс гиҗ нерәднә.