Иерусалимд Иисусин ирлһн

Пасх өөрдҗ йовла. Иисус сурһульчнртаһан Вифанияс Иерусалим орв. Олн әмтн эдниг дахҗ йовла. Иерусалимд Энүг алдр зовлң күләҗәнә, гиҗ йовхиннь өмн кесг дәкҗ келсн билә. Эклцднь эн йовлһн байрта йовлһн болҗ медгдҗәлә. Пальмин хамтхасар дайлҗ, байрта әмтн Деед Эзиг тосдг билә. Пальм модн - диилврин, сулдхврин темдг гиҗ бәәсмн. Иисусиг тосчасн Иерусалимин әмтн кезәңк күслинь Эн бүтәх гиҗ нәәлҗәсмн. Иудеймүдин хан, Мессия эдниг римлянмудын йоснас сулдхх гиҗ әәлдәчнрәр дамҗулҗ, Бурхн үгән өгсмн. Назаретәс ирсн Иисус кенәс чигн давуһар тиим Хаанла ирлцҗәлә.

Эн олн әмтн ю ухалҗахиг Деед Эзн меддг билә. «Ирх Хан номһн, элҗгн деер сууҗ ирх…», - гиҗ әәлдәч Захарийяр дамҗулҗ, Бурхн Бурхна Үгд Иисусин тускар келсиг чигн меддг билә. Эврәннь Теңгрин Эцкин күслиг күцәхин төлә шидр бәәсн селәнәс Нанд элҗг авад иртн, гиҗ эн сурһульчнран илгәв. Сурһульчнрнь Иисусин заквриг күцәҗ, баахн элҗгиг авч ирв. Нурһн деернь эврәннь хувцан делгхлә, Деед Эзн деернь суув. Энүг дахҗ йовсн әмтн байртаһар хәәкрцхәв:

- Осанна! Деед Эзнә төлә йовҗ йовх буйнта-әдстә болтха! Осанна деедст!

Осанна гисн иудеймүдин хуучн үг - Деед Эзн, әдслл, хәәрл, мадниг харс гисн учр-утхта.

Зәрмнь: «Аллилуйя!» - гиҗ хәәкрцхәв. Эн үг «Бурхиг магтхтн!» гисн чинртә.

Дарунь тосчах улсин седкл бахмҗар дүүрч, эдн Бурхнд туурмҗ өргҗ хәәкрцхәв:

- Иисус, Маднд нөкд болтха, гиҗ Бурхн илгәсн Күнч!

Әмтн Иисусла мендлхин төлә пальм модна бүчрмүд хуһлҗ авцхав. Эдн улм чаңһар хәәкрцхәв:

- Чамаг магтхҗанавидн! Бурхна Илгәч болҗ Чи маднур ирвч! Чи мана Хан! Чи маднд төвкнүн бәәлһ авч ирвч!

Хаана өмн делгдг ут кевсин ормд әмтн хувцан тәәләд, тооста һазр деер делгв. Иисус - ирх гиҗ келсн Аврач гиснд иткҗәхән әмтн тииҗ үзүлв. Эн эднә Хан болх зөвтә! Байрлҗах әмтн тал улм олн әмтн өөрдҗ, хамдан байрлцхав. Альдаран эс хәләнч, эргнд байрта, инәҗәх чирәтә әмтн, байрта хәәкрлһн, олн әмтнә җирһлһн. Болв цуһар эн байриг хувалцсн уга. Зәрм фарисеймүд дурго бәәдлтәһәр эн байриг хәләһәд зогсчасн билә. Эдн Иисус тал өөрдҗ ирәд келцхәв:

- Эн болҗах юмиг зогса! Кемр Чамаг Хан гиҗ нерәдҗәхиг римлянмуд соңсхла, Чамд эвго юмн учрх. Эдн ю хәәкрҗәхән медҗәхш. Ә тасртн ги.

Эгл улсин дунд Иисус фарисеймүдәс даву тоомср, күндллһ олснд эдн үлү үзв. Иудеймүдин күндллһ геехвидн гиҗ фарисеймүд әәцхәв.

- Уга, - гиҗ Иисус келв, - кемр эн әмтн тагчгрхла, чолуд хәәкрлдх. Бурхнд эдн магтал өргтхә!

Деед Эзиг магтҗах улсас кесгнь цөөкн өдр болад, мартх, дахҗ йовшгоһинь Тер медлә. Эднә дурн дурго боллһнд хүврх, Терүг эдн кирст дүүҗләд алх.