Закхейлә учрсн харһлт

Закхей Иерихонд бәәдг билә. Эн алв цуглулдг улсин ахлач бәәсмн.

Олн әмтн меддг байн күн билә. Көдлдг һазрнь Иехирон балһсна үүднәс хол биш билә. Балһснд хулд-гүүлгә кехәр ирҗ йовх әмтн даңгин эднә өөгүр давҗ һардг бәәсмн.

- Зогстн! - гиҗ Закхей эдниг зогсадг билә. - Алв өглго давх зөв нег чигн күүнд уга. Мөңгән һарһтн - хойр цаһан мөңг - римин һардвр тиим алв тогтасмн.

Шүдән хәврҗәһәд, эдн мөңгән һарһхла, Закхей байрлдг билә. Юңгад гихлә эн саамла энүнә зөөр дәкнәс өсдг бәәсмн. Римин һардачнрт эн нег цаһан мөңг өгх, наадкинь бийдән үлдәх.

Эн даңгин инәсн йовдг болв чигн, хөв уга күн билә. Юңгад гихлә терүнд цуһар дурго бәәсмн. Ик зунь энүнд хар сандг бәәсмн. Юңгад әмтн бийднь дурго болҗахиг, терүнд эврән гемтәһән эн меддг билә. Эн хаҗһр йовдл һарһдг биләхн.

Удлго Иерихонд Иисус ирх, гиҗ әмтн күүндҗәхиг Закхей соңсв.

- Иисус?

Закхей чикән өгв.

«Иисус! Терүг бас үзхм бәәҗ, нер һарсн күнлм. Иисус әмтнд дурта, гиҗ келцхәнә, болв нанд Тер дурго болх, - гиҗ Закхей санв. - Цуһар нанд дурго. Тиим болв чигн Терүг үзхм бәәҗ».

Эврәннь көдлмшән нөкднртән даалһчкад, Иисусин йовх уульнцд эн ирв. Болв Деед Эзиг үзх седклтә йир олн әмтн тенд хурсн бәәҗ. Закхей маштг нурһта күн билә, тегәд әмтн дундас Иисусиг үзҗ чадҗахш.

Ода Закхей яахмб? Уульнцд юн болҗахиг үзхин төлә нег өндр юмн деер һарх кергтә. Хол биш эн мод үзв. Алв цуглулдг улсин һардач мод давшҗ йовхиг үзсн әмтн музхлзцхав. Зуг Закхей эдниг төртән авсн уга. Яһад болв чигн Иисусиг эн үзхәр седв.

Тиигҗәхлә арвн хойр сурһульчан дахулсн Иисус аашна. Теднә ардас олн әмтн йовҗ йовна. Дорань юн болҗахиг Закхей оньган өгч хәләҗәнә…

Болв уга! Иисус өөгүрнь давҗ һарсн уга! Модна дор зогсад, деегшән хәләһәд, чаңһар келв:

- Закхей, модн деерәс бу! Эндр Би чамур гиичлҗ одхар седҗәнәв!

«Эн намаг альдас меднә? - гиҗ Закхей алң болв. - Юңгад эрк биш мини герт ирхәр бәәхмб?»

Болв ухалад суудг цаг уга. Закхей шулун гидгәр шувтрҗ, моднас бууһад, Иисусиг сурһульчнртаһинь дахулад герүрн ирв. Гертән ирн, гиичнриг тоох хот кетн, гиҗ эврәкстән закв. Хотынь сәәнинь ширә деер тәвтн гив. Бийнь Иисусла таньлдсндан тенкән уга байрта бәәнә. Әмтнә келсн үнн болҗ һарв. Иисус энүнд дурго биш. Эн цуг әмтнд дурта. Эн яһҗ бәәдгиг цуг эргндк әмтн меддг Закхейлә әдл улст бас.

Закхейин седкл хүврв. Эн килнц һарһад йовсан Иисусла күүндхләрн медҗ, гемән сурв. Гиичнриг тоолһн төгсхдән өөрдҗ йовхла, Закхей Иисуст:

- Зөөриннь өрәлинь би угатя улст түгәҗ өгнәв. Кемр кен негнәс авх зөвтәһәс үлү деншг авсн болхла, хәрүлҗ дөрвн деншг өгнәв, - гисн үгән өгв.

Иисус гертнь ирснд Закхей йир байрта билә. Терүнлә харһсна хөөн алв цуглулдг күүнә шин җирһл эклв. Бурхна седкләр эн бийән бәрдг болв.

Закхейин гер күртл Иисусиг дахсн зәрм әмтн уурлад:

- Юңгад Иисус иим күн тал йовв? Эн худлч күүнлә мадн нам күүндхшвидн. Нег үлү нег ширә һатц сууҗ, терүнлә нег чигн күн хот уухар седшго. Зуг Иисус терүн тал одв, маднур ирсн уга! - гиҗ эдн дурго болцхав.

Әмтн Иисусиг зәрмдән медҗ чаддго билә.

Деед Эзн болхла Закхейд иигҗ келв:

- Эндр чини гер авргдв. Ода чи авргдвч, Бурхна әмтнә тоод орвч. Эн орчлңд ирхләрн, чамла әдл килнцтә улсиг харсч авхар ирләв.