Сохр кү эдгәллһн

Иисус сурһульчнртаһан болн өөрән дала күүнлә Иерихонас Иерусалимүр һарад йовҗ йовсн цагла цуг әмтн таньдг һуульһнч Вартимей хаалһин амнд суусн билә. Вартимей сохр, тегәд эн һуульһ һуухас нань, көдләд, теҗәл олдг арһ уга.

Һундсн чирәтә сохр күн өдр болһн хаалһин амнд суудмн. Эн орчлңгиг: әмтиг, цецгүд, уулмуд болн тегш һазриг нег үзхнь! - гисн күслтә эн билә.

Нег дәкҗ нег күн энүнд Иисусин тускар келв. Тер сохр улст хара орулна гив.

«Кемр эн Иисус мини нүд эмнәд, хара орулсн болхнь, ямаран айта болх билә, - гиҗ эн санв. Зуг сохр би Иисусиг яһҗ олхмб?»

Нег дәкҗ Вартимей саак кевәрн хаалһин амнд суула. Уульнцд негго юмн болҗахиг эн соңсгдҗах әәһәр медв. Өөгүрнь давҗ йовх әмтнәс эн болһамҗтаһар:

- Ээ, цаатн юн болҗана? - гиҗ сурв.

Нег күн:

- Иисус аашна, - гисн хәрү өгв.

- Иисус?!

Вартимей үүмв. Эн чаңһар хәәкрв:

- Иисус, нанд нөкд бол! Иисус, намаг хәәрл!

- Арһул кел! - гиҗ өөгүрнь давҗ йовсн әмтн энүг хөрхәр седв. - Бичә хәәкрәд бә! Чамаг угаһар Иисусин өөр дала күн хурсн бәәнә. Чини хәәкрлһн Терүнд дуту юмн билә!

Болв Вартимей әмтиг соңссн уга.

- Иисус, нанд нөкд бол! - гиҗ цааранднь давтад, сурад бәәв.

Вартимейин хәәкрсн ду Иисус соңсад зогсв.

Сурһульчнрнь Вартимей тал өөрдҗ ирәд:

- Иисус чамаг соңсв, дуудҗана. Йов Терүнүр, - гицхәв.

Вартимей суусн ормасн үкс босад, түргәр йовв. Нег күн һараснь сүүдәд, Иисусиг төгәләд зогссн әмтиг давҗ өөрдхднь дөң болв.

- Чини төлә ю кехмб? - гисн байрта, җөөлн ду Вартимей соңсв.

- Деед Эзн, би юм үзх седклтәв, - гиҗ тетнәд эн келв.

Иисус энүнд келв:

- Нүдндчн харан ортха! Чини иткл чамаг аврв!

Тиигҗ келсн бийәр Вартимейин нүднд харан орад, эн юм үздг болв.Нег агчмд хурц герл энүг төгәләд авчкв. Насн-җирһлдән эн түрүн болҗ орчлңд иим олн зүсн кев-янзта, өңгтә юмн бәәдгиг үзв. Өврҗ ханшго йовдл! Өмннь зогсчах Иисусин чирә эн үзҗ чадв. Дурар болн өр-өвчәр дүүрсн чирә! Терүг иигҗ хәәрлсн Деед Эзнд яһҗ ханлтан өргхән Вартимей медсн уга.

Бичкн күүкд мет эн байртаһар һәрәдәд, Бурхнд туурмҗ өргв. Иисус үүрмүдтәһән һарад йовхла, эн ардаснь дахад һарв.