Лазарин әмдрлһн

Вифанияд бәәдг Марфа Мария хойрин ахнь Лазарь күндәр гемтв. Ахнь өңгрҗ одх гиҗ эгчнрнь әәһәд, Иисуст зәңг илгәв:

- Деед Эзн! Чини үүрчн күнд гемтә.

Кенә тускар келҗәхиг Деед Эзн медлә, тиим болв чигн зовлңшсн уга. Иим хәрү өгв:

- Әәх юмн уга, эн гемәс көлтә үкшго, Бурхна туурмҗд күргх гем ирҗ!

Лазарь гемтв гисн зәңг авсн һазрт Иисус дәкәд хойр өдр бәәснәннь хөөн келв:

- Йовцхай! Лазарь унтна, Би терүг серүлхәр йовҗанав.

Сурһульчнрнь йовхмн, үлдхмн гиҗ маһдлхла, Иисус келв:

- Лазарь сәәһән хәәҗ! Болв Намаг тенд эс бәәсн учрар Би тадна төлә байрлҗанав, тиигхлә тадн шулуһар иткхит. Йовцхай терүнүр!

Деед Эзн Вифанияд ирхлә, Лазарь дөрвн өдр оршалһна ормд кевтсн бәәҗ. Хотнд йир олн әмтн хурҗ. Марфан болн Мариян зовлңгиг хувалцхар эдн Иерусалимәс болн терүнә эргндк һазрас ирҗ.

Иисус хотнур өөрдҗ йовхиг соңсад, Марфа Терүг тосад һарв. Мария болхла гертән үлдв.

Иисусла харһларн, Марфа Терүнд иигҗ келв:

- Деед Эзн! Чи энд бәәсн болхла, мини ах сәәһән хәәшго билә. Бурхн Чамд сурсичн өгхиг би меднәв!

Иисус келв:

- Ахчн әмдрх!

- Цаг чилсн кемлә, әәмшгтә зарһ болх өдр әмдрхинь би меднәв, - гиҗ Марфа келв.

Иисус терүнд иигҗ келв:

- Әмдрлһн болн җирһл гиснчн Бив. Нанд иткдг күн мөңкинд үкшго. Терүнд иткҗәнч?

- Ээ, Деед Эзн! Чи эн орчлңд ирсн Христос, Бурхна Көвүн гиҗ иткнәв, - гиҗ келчкәд, Иисус ирв, чамаг күләҗәнә, гиҗ эгчдән зәңглхәр гүүв.

Мария эгчиннь келсиг соңсн, шулун гидгәр босад, Иисусиг тосхар гүүв. Терүнә көлд унад, эн уульв. Әмтн цуһар үүмәтә бәәхиг үзсн Иисус, өңгрсн күүг альд кевтүлвт, гиҗ сурв. Әмтн терүнд зааҗ өгв. Иисус өөрдҗ ирәд, ууляд, Лазарь кевтсн хадын көндәд орлһна өөр кевтсн чолу автн гив. Цөөкн күн чолуг цааран кев. Деед Эзн теңгр хәләһәд келв:

- Эцк минь! Чи Намаг соңссн учрар Чамд ханлтан өргҗәнәв.

Тиигҗ келн, чаңһ дууһар келв:

- Лазарь! Нааран һарч ир!

Тиигҗ дуудхлань, өвәрц йовдл учрв! Көл-һарнь оршалһна кенчрәр, чирәнь болхла альчурар боолһата өңгрсн күн һарч ирв. Иисус закв:

- Боодһаһинь автн, йовтха!

Эн өвәрц йовдл үзсн олн иудей Деед Эзн Иисуст иткдг болв.