Иисус күүкдт әдс өгнә

Иисус олн әмтнлә бәәсн нег өдрләрн кесг гемтә әмтиг эдгәһәд, Бурхна болн Бурхна орн-нутгин тускар эднд келҗ өгв, дәкәд Бурхна үг цәәлһдг улсин мектә сурврмудт хәрү өгв. Иисусин өөр олн әмтн цуглрв. Иисусур нег баг залус болн күүкд улс бичкдүдтәһән өөрдҗ ирв.

- Түрд гиҗәтн, - гиҗ нег күн келв, - альдаран йовхар седҗәнәт?

- Иисусур, - гиҗ нег күүкд күн келв, - Иисус бичкн күүкдт һаран күргҗ әдс өгтхә.

- Бичкдүд! - гиҗ зогсҗасн улсин негнь дургоһар хәәкрв.

- Иисусд чинртә олн керг бәәнә, тана бичкдүдлә харһдг цаг уга! Гемтә әмтн эдгхәр күләҗәнә, үзҗәхшвт? Тер Бурхна орн-нутгин тускар тодрхаһар келҗәнә, тадн соңсчант? Тадн болхла, юм меддго бичкдүдән болн нилхсән авч ирвт.

- Күүкд цуг юм медшго болвчн, зуг Бурхн эднд дуртаһинь медх зөвтә. Тегәд би Иисусас сурнав.

- Эн эврәннь цаган күүкдт үрәшго?!

- Буйн болтха, мадниг орултн!

Эднә зүтклдҗәх күүндвр Иисус соңсад келв:

- Бичә эдниг хөртн! Күүкд нанур иртхә! Бурхна орн-нутг - теднә!

Сурһульчнр Иисусд алң болв. Эк-эцкнр күүкдтәһән байрлад, Иисусур өөрдҗ ирцхәв. Сурһульчнр цааранднь юн болхинь медхәр өөрдәд зогсцхав.

Иисус теднд келв:

- Би үнәр келҗәнәв! Бурхна орн-нутгиг эн бичкдүдлә әдл әрүн седкләсн медҗ, бийдән эс орулҗ авхла, тер күн Теңгрин орн-нутгт орҗ чадшго.

Тегәд Иисус бичкдүдт әдс өгв, ик күүкдт толһаднь һаран күргв.