Аля көвүнә туск тууҗ

Иисус фарисеймүдт дәкәд нег тууҗ келҗ өгв. Нег күүнд хойр көвүн бәәҗ. Эдн өсәд эцктән нөкд болна.

Ууһн көвүн эцктән дөң күргнә, зуг бийдән күцл тәвхш. Отхн көвүнә тууҗ иим болв. Отхн көвүнднь эцкин заавр амр өгчәхш. Тегәд эн һанцхарн бәәхлә йир сән болх гиҗ санна.

Нег дәкҗ эн эцкүрн ирәд келв:

- Эцк, чи өңгрхлә, би, чини көвүн - өнч авач, тегәд чини зөөрин өрәлнь нанд күртх. Би чини үкл күләҗәхшв, зуг ода нанд мини хүв өгтн, дурндан бәәхәр седҗәнәв. Чини өлг-эдин нег әңгнь нанд үлдх.

Эцкнь иим үг соңсад йир һундна. Эн көвүн эврәннь мөңгән авчкад, гертәс һарч йовхинь эцкнь медв. Зуг энүг үлдәхәр заквр өгсн уга. Тегәд көвүндән хувагдсн зөөр эдлтхә гиҗ өгв.

Хөөннь отхн көвүн нег орн-нутгт одад, тенд үнтә гер, хувц хулдҗ авна, дәкәд ик мөңг хотд болн нәр-нааднд һарһв.

Удлго өөрнь бәәсн әмтн энүг байн, көөрг, бийән буульдг күн гиҗ медцхәв. Зәрм көвүд, күүкд энүнә өөр даңгин бәәцхәв, юңгад гихлә эн теднә эдлвриг күцәнә. Баахн көвүн үүрмүд олҗ авч гиҗ сандг билә. Зуг тедн мөңгнә төлә үүрлдг бәәсмн.

Эн баахн көвүнд дурндан бәәдг иим җирһл йир таасгдна. Эн эврәннь тәвсн күслән күцәнә: Һазр эргәд зуульчлна, олн нәр-наадна герт одна.

Эврәннь төрскн герин тускар сандго билә.

Өдр болһн мөңгнь баһрад йовсиг эн медхш.

Нег дәкҗ олн гиичнр бәәхлә, эн нәәрин хөөн өрән өгхәр седхлә, мөңгнь күрхш.

- Мини мөңгн чилв, - гиҗ әрә ду һарч эн келв. Тадн нанд дөң болтн! Тадн мини үүрмүд!

- Үүрмүд? - бурушаҗ эдн сурв. - Бидн үүрмүд биш, мөңгн уга күн гиичнриг дуудмн биш. Байрта үлдтн! - гиҗ келәд, цуһар һарад йовцхав.

Баахн көвүн һазр эргәд йовдг күн болв. Тегәд түрү-зүдү гидг юм эн медв. Тер цагт орн-нутгт нег догшн харһнлһн эклв. Негчн күн хотан энүнлә хувалцдго бәәҗ. Көдлмш бас эн олҗ чадсн уга.

Кесгтән көдлмш хәәҗ йовад, нег күүнлә таньлдад, терүнә һахас хәрүлнә. Урднь эн көвүн иим көдлмшиг бузр гиҗ сандг билә. Эн көвүн йир өлсв. Эн һахан тевшәс хот идхәр седлә, зуг эзн өгсн уга. Ода эн һахан өөр сууна-бузр, өлн, шуурха-буурха, дор орсн. Удан цагин туршарт түрүн болҗ көвүн эврәннь герин тускар санв.

«Ямаран һәргтә күн бәәҗүв, - гиҗ эн ухалв, - кемр би гертән үлдсн болхла! Мини эцкд көдлҗәсн әмтн нанас сән бәәнә».

«Би ода ю кехән медҗәнәв, - гиҗ эн келв - Би герүрн хәрнәв. Би күләҗ чадшгов, эцкм хәрү намаг көвүн гиҗ тоолх. Эцкән бийдән седклинь тусулхар седҗәнәв. Нанд мини эцк зовад көдлмш өгхлә, йир сән болх».

Герүрн йовх хаалһ йир ут болв. Хол биш эн эцкин гер үзв. Көвүн зогсв. Гер тал өөрдх дутман, энүнә чидлинь баһрад йовна. Эцкиннь өмн яһҗ би зогсхмб?

Генткн эн медәтә күн гүүҗ йовхиг үзв. Эн нүдән шилтәд, хәләв. Эннь эцкнь бәәҗ!

Медәтә күн һаран дайлад, хәәкрәд, байрлад гүүҗ ирв. Мини ирснд эцкм байрлҗахий?

Эцкм уурлҗахий, эн нанд урднь кевтә дуртай?

Эцкнь өөрдәд ирхлә, көвүн ууляд келв:

- Эцк, би чамд буру һарһсн күмб. Би килнцтәв, тегәд ода чини көвүн-гиҗ нер зүүхд йир һундлта. Гемән сурҗанав, гертән бәәлһх зөв өгхлә, би чини зарц болнав. Ямаранчн күнд көдлмш би кенәв, юңгад гихлә һарһсн му йовдлан чиклхәр бәәнәв.

Эцк көвүһән теврәд үмсв. Эдн хоюрн хәрцхәв. Тенд эцкнь зарцнрт келв:

- Көвүндм йир сән хувц авч иртн! Асрҗасн туһлыг алтн! Байр кехд, маднд нег учр бәәнә! Мини көвүн өңгрсн билә - ода әмдрв, геедрсн билә - ода олдв.