Геедрсн хөөнә туск тууҗ

Нег дәкҗ Иисус Бурхна үг цәәлһдг улст болн фарисеймүдт иим тууҗ келҗ өгв.

Нег хөөч эврәннь хөөдән арднь орҗ хәләдг бәәҗ. Эн негчн хө зун хөөнәс, хош малас салад, геедрәд үлдшгоһинь сәәнәр хәләдг бәәҗ. Эн малмудт дурта, сән хөөч билә, юңгад гихлә сән чинәтә малмуд герүрн цуһар бүрн-бүтн ирнә. Нег дәкҗ асхн хошин мал тоолхла, хөөдин то йирн йисн болв.

Хөөч дәкәд тоолв-хәрү йирин йисн! Тиигхлә нег хөн уга болҗ оч, - чон идсмн аль гүн нүкнд унсмб? Яһад болв чигн олҗ авх кергтә!

Хөөч хошин малмудан дәкәд хәләхлә, нег бичкн хурһн уга бәәҗ-энүнә хамр деернь хар толвң бәәсмн.

Өргн үүдән сәәнәр хаачкад, хөөч хурһан хәәһәд һарв. Йирн йисн хөөдиг күн уга үлдәсндән энүнд му ухан орад бәәв, зуг геедрсн хурһнд әәмшг учрх гиһәд шулун күрхәр седнә.

Уул күртл адһҗ гүүһәд, эн чидлән геев. Тогтнад зогсхд эрт - хурһ хәәлһн шинкән эклв. Бәәҗ-бәәҗәһәд хөөч ормдан зогсад, чаңһар хәәкрәд хурһан дуудна. Зуг өөр бәәсн өөдмәс мәәллһн соңсгдхш.

Тер хурһн нүкнд бичә унтхал! Хөөч эрг деер һарад, хәрү хурһан дуудна.

- Бэ-э-э-э! - гисиг соңсад, хөөчин зүркн бульглад, байрлад бәәв. Энүнә хурһн әмд!

Эн хурһна ә һарчасн тал хурдар гүүҗ ирв. Хурһн әрә гиҗ хадын кердәг деер зогсҗана, өмәрән чигн, ардагшан чигн һарч чадҗахш.

Хөөч хад хәләчкәд, хурһан авх арһ хәәв.

- Зеткртә юмн, зуг хурһан әәмшгәс гетлүлҗ болхмн, - гиҗ эн ухалв.

Хөөч болһаҗ дорагшан бууһад, хурһан ээм деерән тәвәд деергшән һарв. Эн теңкән уга байрта! Әәмшгәс һарсн хурһн хөөчин күзүнд шахлдна.

- Тегәд Бурхн Терүнәс хольҗсн әмтиг хәәҗ авна, - гиҗ Иисус Эврәннь келврән төгсәв. - Тадн итктн, килнц уга йирн йисн күүнд биш гемән сурсн нег килнцтә күүнд теңгр байрлх.