Иисус Вифаниид

Иисус Иерусалим балһснд ирхләрн, терүнәс цөөкн дуунад бәәх Вифания селәнд дару-дарунь оддг билә. Тендән эн эврәннь сурһуль дахгч улсин болн үүрмүдиннь - Мария, Марфа болн эднә ах Лазарин герт оддг билә.

Дарани нег одлһнд Мария сууһад, Иисусиг соңсчала, Марфа болхла олн зүсн хот-хол белдҗәлә. Дарунь Марфа Иисусур өөрдҗ ирәд һундлтаһар келв:

- Деед Эзн! Мини эгч цуг герин аху нанд даалһснь, Чини хәләцәр, буру биший? Нанд нөкд бол гиһәд кел энүнд!

Зуг Иисус эвлүнәр энүг бурушав:

- Марфа! Марфа! Чи цугтаннь арһ хәәһәд, үүмәд бәәнәч, зуг һанцхн юмн кергтәлм! Мария хамгин сәәнинь шүүҗ авч, эннь энүнәс алдршго.

Юуна тускар алдр Багш келҗәсмн? Һоллгч биш кергт дала оньг өгәд бәәхм биш гиҗ эн Марфад болн цуг наадк әмтнд заахар келсн болдг. Ухани зөөр хар чидләс даву ик чинртәг Марфа, Мария кевтә, сәәнәр медх зөвтә бәәсмн. Һазр деерк әмтнә җирһл эрт болну аль ора болну чилдг, зуг сәнь - Иисус Христост итклһиг күүнәс булаҗ авч болшго. Болв һазрин җирһлиг тас керглхм биш гиҗәх юмн биш. Цуг әмтнд эврә күцәх керг болн күсл бәәдг. Зуг эднә керг-күслнь Бурхна ухани зөөрәс давх зөв уга, Марфан үлгүр энүг медүлв. Марфад хот-хол белдәд, әмт тоолһн тер саамд Аврачин үгәс даву һоллгч керг болҗ.