Цаһан седклтә самарянина тууҗ

Нег дәкҗ Әрүн Үг сәәнәр меддг күн Иисусур ирҗ. Тер цагт тиим улсиг закана улс эс гиҗ Бурхна йос меддг улс гиҗ нерәддг бәәҗ. Эврәннь әмнә төлә биш, Багшиг сөрхәр эн Багшт нег сурвр белдҗ.

Эн санв: «Кемр Иисус Энүнд хәрү өгсн цагт, би Энүнә эндүһинь зааҗ чадхв».

Худлар зуһудад, эн Багшас:

- Багш, мөңк җирһл Бурхнас авхин төлә нанд ю кех кергтә?

Өмнәснь Иисус сурв:

- Әрүн Үгд юн гиҗ бичәтә?

Энүнднь мектә закана күүнд бийднь хәрү өгх зөвтә болв.

- Бурхиг, өөрән бәәсн хамгиг бийән мет, зүркән өгч дурлх кергтә - гиҗ бичәтә.

- Чик, - Иисус зөвшәрв, - тиим метәр бә, тегәд мөңк җирһл олхч.

Закана күн бийиннь чинр дора орулсиг медәд, адһмтаһар келв:

- Ээ, энүг меддүв. Зуг кениг өөрхн гиҗ санхв?

- Би чамд нег тууҗ келҗ өгнәв, - гиҗ Иисус хәрү өгв.

Нег күн Иерусалимас Иерихон орҗ йовҗ. Энүнә хаалһнь әмтн бәәршлдго, йовдсн улсиг деермчнр тондг эҗго һазрар давҗ һархмн бәәҗ. Эн йовдсн күүг үзн, деермчнр хад чолун һатцас гүүҗ һарад энүнүр дәврв. Бийинь гүвдәд, бәәсн юминь булаҗ авад, шавта күүг хаалһ деер үлдәчкәд, гүүлдәд йовҗ одв.

Удан боллго эн хаалһар бурхна гелң йовҗ. Кевтсн шавта кү үзн, эн адһмтаһар давад йовҗ одв. Бурхна гелң энүнд нөкд болхар седсн уга. Дарунь шавта күүнә өөгүр левит (сүмд церглдг күн), давад һарв. Эн бас, түрүн күн мет, өөрнь зогслго, үкс давв.

Аш сүүлднь ээлҗгән унсн һурвдгч күн өөгүрнь йовв. Эн бурхна гелң чигн биш, левит чигн биш, нам израиль келн күн биш бәәҗ. Эн самарянин бәәҗ, Самариин бәәрн күн. Бурхиг хаҗһрар тевчнә гиһәд, израильтянрин ик зунь эднд дурго болдг бәәҗ. Тегәд дуту хөвтә шавта күн самарянинас тус үзхүв гиҗ санҗасмн уга. Зуг самарянин, шавта кү үзн, энүнд санань зовв. Энүнә шавинь бооһад, арһул ээлҗгн деерән суулһад, хаалһин туршт дөңнәд, гиичлүрүр күргв.

Самарянин шавта күүнд хонх хоран мөңгинь өгв. Өрүнднь мендләд һарчаһад, эзнднь мөңг өгәд келв: «Эн кү хәләҗә, кемр эн мөңгн эс күрхлә, би хәрүдтән һарһсн мөңгичн цугинь даңцанав».

- Тегәд зовлң үзсн күүнд кен өөрхн болҗ? - гиҗ тууҗан төгсәһәд, Иисус сурв.

Эн сурврин хәрүнь йир амр билә.

- Медгдв, кен нөкд болснь, - гиҗ закана күн келв.

- Чик, - гиҗ Иисус зөвшәрв, чи бас тиигҗ йов!