Иисус усн деегүр йовҗ йовна

Сө болв. Сурһульчнрта оңһц Галилейск теңгсәр усчҗ йовна Әдстә Иисус уга. Эн һанцарн уул деер онц мөргҗәлә. Сурһульчнр цааранднь час шаху хәәвдцхәв. Ик салькн көдлснәс көлтә, күчңгдх кергтә болв. Дольган оңһциг нәәхлүләд бәәв, әәмшг икдв, эднд Капернаумд күрх кергтә гиҗ Иисус заксмн. Эн ора ирх болҗ үгән өгч.

Сурһульчнр оңһцан һолын амнд архлхар седв, зуг эн тас болҗахмн уга - салькн оңһциг хаяд бәәв. Салькна күчн йир ик, зуг сурһульчнрт энүнлә ноолддг арһ уга.

Генткн сурһульчнр гилвкҗәсн юм үзцхәв. Эн усн деер нәәхлн бәәҗ, оңһцур өөрдәд йовна. Өөрдә йовтлнь, эдн кү үзв. Сурһульчнрин негнь әәһәд, хәәкрв. Усар күүнә цогц көндрҗ йовна! Эн болшго юмн!

Эднүр өөрдҗ йовсн юмн үзгдл болх эс гиҗ талдан цәәлһҗ болшго әәмшгтә юмн болх!

Ода эдн тодрхаһар үзцхәв, күн мет, кемр эн күн болхла-һаран амндан күргв, ууҗмас энүг сәәнәр соңсгддгар, юңгад гихлә салькн үгмүдинь дарв, эн хәәкрв:

- Бичә әәтн! Бив!

Эн Иисус, эднә Багш! Эдн энүг дууһарнь таньв. Чееҗнь тәвгдсн болҗ медгдв. Сурһульчнр санамрдад, энүг оңһцур өөрдҗ ирхинь күләв. Эднәс негнь күләшго болв. Петр йир теслт уга күн бәәсмн. Дәкәд эн Иисуст йир дурта бәәсндән, байртаһар өмнәснь гүүҗ одад, хамгин түрүнд харһхар седсмн. Зуг эн күцәгдшго йовдл. Чивҗ үклго кен усн деегүр йовҗ чадх?

«Юңгад эс болх билә? - гиҗ Петр санв. - Кемр Иисус усар йовхла, би чигн йовҗ чадхув. Зуг эврән биш, энүнә дөңгәр».

Мел иим ухан толһаднь орм цацу, эн хәәкрв:

- Деед Эзн, кемр лавта Чи болхла, намаг Чамур усн деегүр йовад иртхә гиҗ зак!

Иисус келв:

- Йов!

Петр оңһцин хаҗу алхад, нег көләрн усн деер зогсв. Усн, хату һазр мет, энүг бәрв. Хойрдгч көләрн усн деегүр ишкәд, йовв.

Эн усн деегүр йовв! Иисус эн хойр нег-негнүрн өөрдв.

Ик өндр дольган шуд бийүрнь аашхиг Петр генткн үзв. Дольган өөдән босад, көөстәд энүнә өөр унв. Петр Иисусур дәкҗ хәләлго, цуг оньган дольганд өгв. Эн саамд эн икәр әәв. Эн дольган деер усна деер мет зогсч чадхий? Минь эн цагла эн уснд булхад, хәәкрв:

- Деед Эзн, нөкд бол!

Иисус өөрнь ирчксн бәәҗ. Эн һаран өгәд, чивҗәх Петриг татад авв.

- Баһ итклтәч! Юңгад чи маһдлвч? - гиҗ Эн сурв.

Петр әмд һарв, зуг эврәннь итклин күчәр биш, Иисус Христосин, Бурхна Көвүнә күчәр.

Тер хоорнд наадк сурһульчнрнь өөрдҗ ирцхәв. Иисус Петрта хамдан оңһцд орв. Мел эн саамла салькн тогтнв. Оңһц дольганд арһул көндрәд бәәв.

Учрсн эн йовдлмуд йир икәр сурһульчнриг өврүлв, эдн Иисусур өөрдәд, тер цагт хаанд мөргснлә әдл, энүнд сөгдәд келв:

- Иисус, Чи йоста Бурхна Көвүнч!

Иисусин нөкд угаһар үкх бәәсән эн сө эдн дәкәд нег лавта медв.