Тавн миңһн кү цадхуллһн

Иисус өдрин дуусн олн әмтнлә күүндв. Энүнә соңсачнр дунд һанцхн залус тавн миңһн билә, терүнәс баһ биш то күүкд улс болн бичкдүд. Иисус Бурхна Үг тархасн деерән Терүн тал ирсн гемтә улсиг эдгәдг билә.

Асхн кецәҗ йовх цагла сурһульчнь Иисуст келв:

- Багш, әмтнд нег юм идх кергтә.

Иисус инәмскләд келв:

- Тадн теднд хот өгтн!

- Иим дала күүнә төлә альд мадн хот хулдҗ авхмб? Маднд тавхн өдмг болн хойр заһсн бәәнә, - гиҗ Филипп келв. - Һазр көдә. Дәкәд болхла маднд дала мөңгн уга.

Иисус келв:

- Өдмгән болн заһсан Нанд авад ирлт.

Иисус өдмг авчкад, Бурхнд ханлтан өргәд, Терүнәс әдс сурв. Тиигчкәд һуйриг хуһлад, сурһульчнрнь бел кеһәд бәрҗәсн зембльд хуваһад тәвәд бәәв. Заһсиг бас хуваһад, зембльд тәвв.

Сурһульчнрнь нүдән нухв. Юн болҗахнь эднд медгдҗәхш. Өдмгтә болн заһста нег зембль - төр уга. Зуг бәәсн цуг зембль дүүрң хотта! Багд хувагдад, ноһан деер суусн әмтнд өдмг болн заһс түгәһәд өгв чигн зембльд бәәсн хот баһрҗахш. Цугтаднь күртв! Күн болһн цадв.

Эн Иисус юн Күн болхмби? Иим буйнта керг күцәхин төлә альдас Эн чидл авна?

- Баг әмт болһиг эргәд, үлдсн хот цуглултн. Нег чигн умш үрх зөв уга, - гиҗ Иисус Эврәннь сурһульчнртан келв.

Тедн цуһараһинь цуглулад ирхлә, күн болһна сав дүүрң хотта бәәҗ. Әмтн цуһар цадсн бийнь, үлдсн хот бәәснәс дала.

Эднә нүүрт учрсн өвәрц йовдлд әмтн алң болҗ келцхәв:

- Энтн орчлңд ирх бәәсн Әәлдәч мөн.

Зуг, харм төрхд, Иисус ю күцхәр бәәхиг эс медҗ ядсн әмтн тер тавн миңһн күүнә дунд бас бәәҗ. «Кемр Иисуст теҗәл олхд йир амр болҗахла, маднд теҗәлин төлә нам көдләд керг уга. Терүгәр хааһан кехмн, маднд килмҗән тусхаҗ, цуг мана төрмүдиг хаһлтха», - гиҗ эдн санв.

Иисус әмтнә ухалҗах санаг медлә, болв Эн хан болхар орчлңд ирсн уга билә. Тегәд Иисус адһмтаһар тер һазрас һарч йовад, әмтнәс бултҗ, уулур һарв. Тенд һанцарн Бурхнд зальврхар шиидв.

Әмтн гер-герүрн тарцхав. Зәрмснь болхла Иисуст һундв.