Бурхн өгнәв гиҗ үгән өгсн һазр

Нойин көвүд олн үртә бәәҗ. Нойин көвүдәс дала үрдүд һарад, теднә үңг-тохмас олн келн-әмтн үүдсмн. Тедн цуг һазр деегүр тарад йовсмн. Бурхна келсн үг иигҗ күрсмн. Усна аюлын хөөн Нойд болн терүнә көвүдт Бурхн әдс өгәд, йорәһәд келлә: «Уңг-тохмарн олн болтн, төрәд һазр дүүргтн». Эн улс тер цагт чик седклтә аль хар саната бәәсмб? Теднәс кесгнь үнн Бурхан мартсмн, юңгад гихлә тедн Бурхиг үзҗ чаддго бәәсмн. Эн улс бийдән чолуһар болн модар бурхна зүстә бичкн күн көшә кеҗ авч. Модар болн чолуһар кесн эн бурхдан әмтн энд-тенд һазр деер тәвлдәд, теднә өмн сөгдәд, зальврад, иигҗ келдг бәәсмн: «Эн-мана бурхд, мадниг үүдәлә, маднд хот өгнә».

Тер цагт һазр деер бәәсн әмтнә ик зунь алтар, цаһан мөңгәр кесн тиим күн көшәд итклдәд, йоста Үүдәчән мартв.

Бурхн теңгрәс үзәд ик гидгәр уурлв. Зуг әмтиг Бурхн цааҗлҗ уга кехәр седсмн биш. Юңгад гихлә делкәһүр цуг олн әмтнә килнцин төлә әмн-җирһлән өгх Аврач ирх зөвтә билә. Эн Аврач күүнә килнцин төлә ирәд үкх.

Бурхн Авраам гисн нертә кү шүүҗ авсмн. Эн күүнәс Бурхн Эврәннь онц келн-әмт үүдәхәр шиидсмн. Аврамин уңг-тохмас Аврач делкәһүр ирх зөвтә билә.

Бурхн Авраамд келв:

- Эврәннь төрскн һазрасн, элгн-саднасн, эцкиннь гертәсн һарад Мини зааҗ өгх һазрур йов. Би чамас күчтә алдр келн-әмт үүдәхв. Би чамд әдс өгч йөрәнәв. Би чини нериг туурулхв.

Авраам эврәннь аваль Сарратаһан, Лот гидг нертә ач көвүтәһән Бурхна келсәр һарад йовв.

Ханаан һазрур Бурхна келсәр Авраам йовв. Эн һазрт күрәд, Авраам дәкн Бурхна келсн үг тодрхаһар соңсв:

- Би эн һазриг чини хөөт үйнрт өгнәв.

Авраам Бурхна келсинь соңсад, ик гидгәр байрлад иигҗ ухалв: «Ханаана һазр-мини күрх һазр!» Тенд Авраам чолуһар тәкл кеһәд Деед Эзн Бурхнд бәрцән бәрв.

Болв Авраамд Бурхна хөөт үйнрин тускар келсн үг медгдсн уга. Юңгад гихлә Авраам Сарра хойрт үрн уга билә. Тер бийнь Авраам Бурхнд иткәд, эврәннь җирһлән Бурхна һарт өгв.

Деед Эзн Бурхн Авраамд оньдин келдг бәәҗ: «Би чамаг Авраам әдс өгч йөрәҗәнәв, чамаг хәләһәд харснав. Нег чигн күн чамд му юм кешго». Мини үр гиҗ Бурхн Авраамиг нерәдлә, юңгад гихлә Бурхн терүг таасдг билә.