Теңгст учрсн догшн аюл

Нег дәкҗ асхн Геннисаретск нуурин эрг деер хурсн әмтнд заавран өгәд дуусчкад, Иисус сурһульчнртан иигҗ келв:

- Нуурин цаадк эргүр һатлый.

Сурһульчнрнь оңһц белдәд, Иисусла хамдан оңһцдан сууһад эдн һарад йовв.

Муурсн Иисус оңһцин ар хүвд кевтәд амрв. Генткн догшн салькн көдлв. Галилейск теңгст даңгин салькн көдлдг билә. Дольган оңһциг цокад, булхулн алдад бәәнә. Ямаран әәмшг учрхинь медәд, әәсн сурһульчнр Деед Эзниг серүлв:

- Багш, мадн хорн гиҗәнәвидн, Чамд йилһл угай?

Иисус босв. Һалзурҗах дольга үзәд, салькна ишкрлһ соңсад, оңһциг нааран-цааран хайҗахиг медв. Эн аюлд хәәкрв:

- Ә таср! Болҗ!

Догшн салькн тер дарунь номһрв. Теңгсин усн нүр үздг мет гилгр болҗ одв.

Өвәрц йовдл! Хурта догшн салькн кезәд чигн генткн номһрҗ зогсдго билә. Дольган чигн әрәхнүр номһрдг бәәсмн. Ода болхла - нег агчм - төвкнүн, ә-чимән уга!

Тиим юм сурһульчнрнь үзәд уга билә. Деед Эзн теднәс сурв:

- Юңгад тадн иим әәмтхәт? Тана иткл альд, баһ итклтә улс?

Әәсн, алң болсн сурһульчнр нег-негндән келцхәв:

- Салькн чигн, теңгс чигн заквринь күцәнә, Эн кен болхмби?

Эднә Багш - Бурхна Көвүн гиҗ иткҗ, бийдән шиңгәсн бийнь, эдн ухан-санаһарн медҗ ядв.