Иаирин күүкнә әмдрлһн

Урднь Иаир иим хурдар гүүһәд уга билә. Эн синагоган (иудеймүд цуглрад, зальврдг гер) һардачнрин негнь бәәсмн. Иим ямта улс гүүдго бәәсмн. Болв энүнә күүкнь сәәһән хән гиҗәнә. Күүкн арвн хойрта билә. Иаир күүкндән йир дурта бәәсмн. Өдр ирвәс үрнь муурч йовхиг эн үзҗ зовна. Дигтә тер цагла Иисус сурһульчнртаһан балһснд ирв. Иаир Терүнәс дөң сурхар шиидв. Иисусур ирәд, эн көлднь унв. Үрндән дөң болҗ чадлго цөкрсн эцк эрн сурв:

- Багш, мини күүкм йовҗ одн гиҗәнә. Ирәд, әминь аврхнч, гиҗ Чамаг эрҗәнәв. Сурҗанав Чамаг! Адһ, эс гиҗ оратҗ одх!

- Йовий! - гиҗ Иисус терүнд келв. Чи мини өмн йов, Би ардасчн дахнав.

Зуг дала гидг әмтиг давҗ һархд амр биш болсн учрар эдн шулудҗ чадсн уга. Генткн Иаир өмнәснь адһҗ аашх зарцан үзв. Зарцнь келв:

- Чамд Багшиг адһулад керг уга. Күүкнчн минь ода сәәһән хәәв.

Терүг соңсн Иаирин зүркн зогсн алдв. Болв, чилв! Эңкр үрм өңгрҗ одв! Юн чигн нөкд болсн уга. Иаир менрәд, чирәнь үксн күүнә чирә мет цәәҗ одв.

Зарцин келсиг Иисус соңссн билә. Иаириг ээмәснь теврәд, Эн келв:

- Бичә ә, күүкнчн эдгх.

Синагоган һардач иткх, угаһан медсн уга. Зовлңдан даргдсн эн гер талан әрә ишкәд һарв. Иисус ардаснь йовв.

Герүр өөрдәд ирхлә, уульлһн, һашудсн дун соңсгдв. Иисус келв:

- Бичә уульцхатн! Күүкн сәәһән хәәсн уга, унтна!

Келсинь соңссн әмтн зог бәрәд инәлдцхәв. Күүкн өңгрсиг эдн лавта медсн билә. Юңгад Эн иим эк-толһа уга юм келнә! Иисус цуһараһинь цааран һарһчкад, күүкнә эк-эцклә, сурһульчнртаһан - Петрла, Иоаннла болн Иаковла - күүкн кевтсн хораһур орв. Деед Эзн һаринь авад келв:

- Күүкн, бос!

Тиигҗ келхләнь, күүкн гүүнәр кииһән авв. Дәкәд нег кииһән авад, нүдән секв.

Эк-эцкнь бийдән итксн уга. Үрнь әмд! Ямаран хөв гинәт!

- Күүкнд хот өгтн, чидл орулх кергтә, - гиҗ Иисус келв.

Босад, күүкнд инәмсклчкәд, һарад йовв. Алмацсн сурһульчнрнь төвкнлтн, цаг давв. Эдн Багшиннь ардас адһв. Арднь байрта, хөвтә өрк-бүл үлдв.