Белвсн күүкд күүнә көвүнә әмдрлһн

Иисус Галилейск талдан нег балһснур, Наин нертә балһснур, һарад йовв. Йир олн әмтн Энүг дахв. Балһсна үүднд өөрдхләнь, өмнәснь кү оршаҗ йовх әмтн һарч йовҗ. Өңгрсн күн кевтх дамҗурин ардас зовлңдан даргдсн күүкд күн йовна. Зовлңгинь хувалцсн балһсна олн әмтн өөрнь йовна. Күүкд күн белвсн, өңгрсн күн - ор һанцхн үрнь.

Күүкд күн ик зовлңта йовхинь үзсн Иисус энүнд харм төрәд:

- Бичә ууль! - гив.

Әмтн цуһар зогсв. Иисус дамҗур тал өөрдҗ ирәд, һар күрәд, өңгрсн күүнд келв:

- Баахн көвүн! Чамд келҗәнәв, бос!

Баахн көвүн әмдрв, босад, ду һарв. Йоста өвәрц гидг йовдл учрв! Иисус экд көвүһинь әмдрүлв. Терүг үзсн әмтн әәһәд, цаг зуур тагчг болцхав. Хөөннь болхла нег-негнәннь келсн үг зогсаҗ:

- Алдр әәлдәч маднур ирв! Бурхн Эврәннь келн улсан санад ирв!

Әмтн Израилевин Бурхиг магтад, туурмҗ өргцхәв. Наинд болсн өвәрц йовдлын туск зәңг тер дарунь цуг Иудейәр тарв.