Күүкд күүг эдгәлһн

Иисус оңһцар хәрү Капернаумд ирхләг, энд Терүг олн әмтн күләҗәсн бәәҗ.

Балһсна уутьхн уульнцар цуһар Энүнә ардас йовцхав. Өөрнь әмтн шахгдад йовҗ йовхас көлтә Иисус әрә гиҗ йовв.

Генткн Иисус зогсад, ардан хәләһәд сурв:

- Кен нанд һар күрв?

Чидлән алдсан Эн медв. Алң болсн сурһульчнрнь:

- Багш! Әмтн чамаг аарглад шахҗахиг Чи эврән үзҗәнәлмч. Чи болхла кен нанд һар күрв, гиҗ сурнач?

Иисус теднд юм келлго, эргндән хәләһәд, һар күрсн кү хәәв.

Иисусин ардас йовҗ йовсн әмтн дунд нег гемтә күүкд күн йовла. Арвн хойр җилдән эн олн эмчнрт бийән үзүләд, эмнүлсн билә. Цуг зөөсн зөөрнь эмнлһнд һарсн бийнь, эн эдгсн уга. Иисусин өвәрц йовдлмудын тускар соңсад, бийән эмнүлхәр эн ирв. Деед Эзн энүг бичә үзтхә гиҗ, эн ардаснь өөрдәд, иигҗ санв: «Энүнә хувцна захд күрхләрн, би эдгхүв». Эн күүкд күн Иисус энүг эдгәх гисн бат итклтә билә! Алдр Багшин хувцнд әрә һар күрн, эдгсән эн медв.

Кен эдгсиг Иисус медсн бийнь, күүкд күн эврән өөрдҗ ирх гиҗ күләв. Күүкд күн ирв.

Әәсн, чичрсн күүкд күн Деед Эзнә көлд унад, цугинь келҗ өгв. Иисус йир дурн седкләр келсиг күүкд күн соңсв:

- Кукн минь, чини иткл чамаг аврв. Сән-сәәхн йов!