Чинән уга күүг эдгәлһн

- Чи зәңг соңсвч? - гиҗ нег залу нәәҗәсн сурв. - Иисус мана хотнд ирсн бәәнә! Гемтә улсиг эдгәдг Күн.

- Чи мана нәәҗин тускар санвчи? Терчн йовҗ чадҗахшлм. Яһҗ тер Иисуст күрх?

- Һар деерән терүг Иисусур күргий! - гиҗ залу келв. Дарунь эдн дәкәд хойр таньл күүһәр нөкд авад, сүүдр дәврсн нәәҗ талан ирв. Хамдан дамҗур кеһәд, нәәҗән терүн деер кевтүләд, Иисус бәәх герүр эдн адһцхав. Зуг ямаран мууль! Герин үүднә өөр йир дала әмтн хурҗ, цуһар Иисусиг үзхәр, соңсхар седҗәнә. Тәкрсн нәәҗән һар деерән авч йовх үүрмүд Иисус тал күрч чадшгонь медгдҗәнә. Гентн нег үүрнь байрлсн бәәдл һарв.

- Нанд нег сән ухан орв! - гиҗ байртаһар тер келв - Ораһар дамҗад!

- Ораһар дамҗад? Яһҗ орхар седҗәнч?

- Герин ора йирин шаврар кесн. Терүнд нүк кеһәд, үүрән деесәр буулһхмн.

Келв - күцәгдв. Деес болн зер-зев хәәһәд, негнь гүүҗ одв. Үлдснь чидл уга нәәҗән давшурар герин тегш ора деер һарһв. Эдн удан көдлсн уга: гемтә үүрән деесәр бууҗ болһх кемҗәтә нүкн белн болв. Дигтә Иисус зогсчасн ормла тер нүкн ирлцҗ кегдҗ. Тер нүкиг төгәлҗәх баһ дүүвр наста залусин түңшүрдсн чирәс дорас үзҗ болхмн билә. Иисус инәмсклҗ, деегшән хәләв. Деерәс деесәр буулһсн чинән-чидл уга кү хәләчкәд келв:

- Чини килнцчн тәвгдҗәнә.

Иисусин ард зогсчасн Закана багшнр болн фарисеймүд уурлцхав. Юңгад гихлә, зуг Бурхн күүнә килнц тәвх зөвтә! Эн Күн бийән Кенд тоолҗахмб? Тер саамд эдн ю сансинь медҗәх Иисус келв:

- Тадн юн гиҗ санҗант, чини килнц тәвгдҗәнә гиҗ келсн, аль бос, йов гисн амрий?

Күүнә килнциг зуг Бурхн тәвҗ чадхиг Закаг йилһән сәәнәр меддг улс меднә. Болв Иисус сүүдр дәәрсн күүнә килнциг тәвҗәнәв гихләрн, йирин шагшавдын багш болҗахан эднд медүлв.

«Энүнә килнц йосндан тәвгдсн угаһинь кен медҗ чадх, гиҗ цуглрсн улс санв. - Кемр Чи эн гемтә күүг эдгәсн болхла, Чамд тиим өвәрц арһ бәәнә гиҗ мадниг иткүлх биләч».

Эдн ю санҗахиг меддг Иисус келв:

- Бурхн Нанд гем эдгәх чидл болн зөв өгсн дәәрән, килнцинь тәвх зөв өгсиг тадн медх зөвтәт.

Тиигҗ келн, Эн гемтә күн тал эргәд келв:

- Бос, эврәннь дер-девскрән авад, хәр!

Залу күн тер дарунь босв, ямаран чигн гем уга, эрүл-менд. Зегсәр гүрәд кесн девскүрән, деесән авад, энүг өврҗ хәләҗәх әмтнә дундаһур давад һарв. Залу Иисуст ханлтан өргҗ, Бурхнд магтал өргв. Герин орад кесн нүкәр хәләҗәсн нәәҗнрнь уга болҗ одв.