Иткҗ болшго дала заһс бәрлһн

Нег дәҗ Иисус Геннисаретск нуурин эрг деер Бурхна Үг тархасн билә. Иисусин келсн үг соңсхар йир олн әмтн хурсн учрар Тер оңһцар нуурин эргәс ууҗмд һарад, тендәс келв. Ууҗмас Терүг цуһар үздг болв, келсинь медхд амр болв. Үгән төгсәчкәд, Иисус Петрт келв:

- Оңһцарн усчад, нуурин дунд күрчкәд, гөлмән хай, дала заһс бәрҗ авхич.

- Ода? Нуурин дунд күрхмби?

Негдвәр, өдртнь күн заһс бәрдгог Петр меднә. Хойрдвар болхла, нуурин дунд күн бас заһс бәрхш. Нур дундан гүн, гөлм йоралднь күрхш, тегәд тенд күн заһс бәрхш. Тегш йоралта нуурин эргд заһсн сәәнәр бәргднә.

- Багш, мадн сөөни дуусн заһс аңнвидн, юмн бәргдсн уга, - гиҗ Петр келв. - Үннднь келхлә, нуурин дунд нег үлү заһсн бәргдшго. Зуг Чи тиигҗ келҗәхлә, би йовад, гөлм хайнав.

Андрей Петр хойр оңһцд сууһад һарв. Иоанн Иаков хойр талдан оңһцд сууһад, ардаснь усчв. Петр болн Андрей нуурин дунд күрн, гөлмән хайв. Кезә заһсн бәргднә гиҗ эдн уснур хәләһәд бәәнә. Генткн уснд заһсна цаһан мөңгн мет хачрсн гилвкәд, дала гидг заһсн бигшв. Заһсчнр гөлмин захас авад татв. Гөлмин күнд кирцәһәр йир дала заһсн торч. Хоюрн тач һарһҗ чадлго, эдн Иаков Иоанн хойриг нөкд болтн гиҗ дуудв.

Дөрвүлн әрә гиҗ татҗ, заһста гөлмән хойр оңһцдан асхв. Дегд күнд болсн учрар гөлмнь нам зәрм әңгәрн тасрҗ одв.

Терүнд иткхд берк! Урднь насндан иим дала заһс эдн бәрәд уга билә! Иим иткҗ болшго дала гидг заһс бәрсндән эдн нам әәцхәв. Әәсн Симон Петр Иисусин өмн чөклҗ унад келв:

- Деед Эзн, нанас заагр, юңгад гихлә би ик килнцтә күмб. Чини өөр зогсх зөв нанд уга!

Болв Иисус һаран ээм деернь тәвәд келв:

- Петр, бич ә. Хөөтндән чи заһс биш, әмт бәрхич!

Иисусин сурһульчнр оңһцсан эрг деер һарһчкад, эн дала заһсиг эд-бод кетн, гиҗ талдан улст даалһчкад, бийснь Иисусиг дахад һарв.