Худгин өөр учрсн харһлт

Нарна күчнд халсн хаалһар баг әмтн йовҗ йовх зурц үзҗ үзий. Сихарь балһсна захд олн зун җил хооран Иаковин малтсн худгур эдн өөрдәд ирв. Иисусиг болн сурһульчнринь мадн таньҗанавидн. Үдин цаг өөрдҗ йовла, тегәд Багш сурһульчнран балһс орад, хот хулдҗ автха гиҗ илгәв. Бийнь болхла худгин өөр үлдв.

Үдин кем билә. Нарн деегшлсн цаг. Иирин иим цагла әмтн худгур ирхш. Болв нег күүкд күн балһснас худгур аашна.

Күүкд күн худгас ус авчахла, генткн Бурхн энүнәс сурв:

- Нанд ус өглч.

Иудей сурсн учрар күүкд күн алң болв. Юңгад гихлә эдн самарянмудла хәрлцдго билә. Болв күүкд күүнә седклиг медсн Иисус энүнд дөң болхар седв. Чинртә төрәр Эн терүнлә күүндв: итклин тускар, яһҗ Деед Эзнд чикәр зальврхин тускар. Иисус келв:

- Бурхн гисн сәкүсн, Терүнд иткдг улс сәкүснд болн үннд зальврх зөвтә.

Альд мөргснь йилһл уга гиҗ Деед Эзн келхәр седлә. Альд болв чигн Бурхнд зальврҗ болна, юңгад гихлә Тер альд болв чигн маднла хамдан. Күүкд күн оньган өгч соңсв, Иисусин келсиг медхднь Әрүн Сәкүсн дөң болв. Күүкд күн нег цагт үннднь күрч медхәр седҗ йовсн билә, тегәд эн келв:

- Мессия, Христос ирхиг би меддүв. Бурхна келсәр бәәхин төлә ю медх зөвтәг маднд Тер ирсн цагтан зарлх.

Иисус күүкд күүнд келв:

- Би ирсн бәәнәв, чамла күүндҗәнәв!

Күүкд күн үнниг меддг болв. Эн - Аврач гиҗ иткх кергтә.

Хөвтә самарянк цуһараднь байрта зәңг күргҗ келхәр балһснур адһв. Эн әмд ус өгсн Аврачла харһв.

Би Бурхнв гиҗ келсн Кү үзтхә, гиһәд күүкд күн Сихарян балһсна әмтиг худгур дуудв.

Балһсна үүмсн цуг әмтн Иисусур адһв, юңгад гихлә эдн Мессияг бас үзхәр седцхәв.

Мини җирһлин тускар цугинь меддг бәәҗ, гиҗ күүкд күүнә келсиг соңсад, Деед Эзн Бурхн ирв гиҗ олн самарянмуд иткв.

Терүн тал ирхләрн, әмтн Иисусиг үлдтхә гиҗ сурцхав. Иисус әмтнлә күүндәд, балһснд хойр өдр бәәв. Улм олн күн Терүнд иткдг болв. Күүкд күүнд болхла эдн байртаһар келцхәв:

- Эн йоста орчлңгин Аврач гиҗ мадн иткҗәнәвидн. Чамас соңсад биш, эврән соңсад медүвидн.