Вавилона бәәшң

Сим, Хам болн Иафет гидг Ноин көвүдин уңг-тохм эн. Усна аюлын хөөн теднәс көвүд төрв. Усна аюлын хөөн әмтнә насн ахрхн болҗ одв. Ной болхла 950 насн күртлән бәәҗ, терүнә көвүн Сим болхла 600 җил наслҗ бәәһәд өңгрсмн. Симин көвүнь 430 җилдән бәәҗ.

Зуг, Нойин тохмин үйнр орчлңгар тархин өмн иим йовдл учрсмн. Әмтн дорд үзгәс Сеннаарин һазрт ирәд, тенд бәәршлнә. Тедн зуг нег келәр хоорндан келдг бәәҗ. Нег дәкҗ тедн юм кехәр ухалад, нег-негнләрн хувалцна:

- Тоосх кехмн, терүгән сәәнәр шатахмн. Теңгрт күрдг бәәшңгтә балһс бийдән тосхий. Тиигҗ эврәннь нерән һарһад, бидн цуг делкәһәр тарад йовхин өмн тиим юм кехмн.

Деед Эзн теднә ик санаһинь үзәд келнә:

- Деерәс буунав. Тедн нег-негән медҗ чадшгон төлә, теднә келинь хутхулад негдүлчкмн.

Нег агчмин зуур әмтн хоорндан келсн үгән медҗ чадшго болв, юңгад гихлә тедн хоорндан олн зүсн келәр келдг болв. Эн учр деерәс балһсна тосхлтыг зогсах кергтә болв.

Деед Эзн тедниг цуг һазр болһнар тарана. Эн учр деерәс тер балһсн Вавилон гиҗ нерәдгддг болв, Усна аюлын хөөн әмтн олн зүсн келәр келдг болв. эн үгин учр-утх - хольх, негдүлх, ниилүлх. Юңгад гихлә тенд олз зүсн келн хольгдв.

Тегәд Вавилона бәәшңгин тууҗ цуг делкән усна аюлын хөөн әмтн юңгад олн зүсн келәр келдг болсна тускар цәәлһҗәнә.