Канад учрсн өвәрц йовдл

Иисус сурһульчнртаһан Галилейд ирәд, һурв өдр давхла, Кана гидг бичкн селәнд хүрм болв. Тер хүрмд Иисусин эк Мария бас ирсн бәәҗ.

Йир сәәхн нәр болв: гиичнр тоогдад, дуулад, бииләд, инәдтә тууҗс келлдәд, хүрмд цаган соньнар давулҗала. Хүрмин гүргүд генткн үүмсн Мария Иисус тал өөрдҗ ирәд шимлдв:

- Чаһр чилҗ одв.

Ямаран үүл! Хүрмин гиичнр күргн хатуч гиҗ санхнь лавта. Мария эн учрсн төриг Иисус хаһлҗ чадх гисн нәәлвртә билә. Зуг экнь Терүнәс ю күләҗәхнь медсн бийнь, Эн келв:

- Күүкд күн, Нанас Чи ю күләҗәнәч? Мини цаг ирәд уга.

Деед Эзнә келсиг Мария медв. Тер ю болв чигн кеҗ чадх гиҗ иткдг билә. Тегәд зарцнр тал өөрдәд, күүкд күн арһул келв:

- Кемр мини Көвүн таднд юм келхлә, эрк биш келсинь күцәтн.

Дала цаг давсн уга, Иисус зарцнр тал өөрдҗ ирв. Эргндән хәләчкәд, Эн зурһан ик чолун донҗг зогсчахиг үзв.

- Эн донҗгудыг дүүргәд ус кетн! - гиҗ Эн зарцнрт келв.

Зурһан донҗгиг дүүргәд ус кетлән, зарцнр баһ биш көлсән асхв.

- Не, тиигәд эн нәәрин ахлач донҗгудт бәәх юмиг амстха, - гиҗ Иисус келв.

Зарцнр нүдән бүлтәлһәд, Иисусиг хәләлдв. Эн юн гидг юм келҗәхмб? Худгас зөөһәд, донҗгутд кесн ус нәәрин ахлач амсх болҗахмб? Назаретәс ирсн эн баахн Күн маднар зооган бәрхәр седҗәхмб? Болв эдн Мариян келсиг тодлҗ, келсәрнь цугинь күцәхәр шиидв.

Нәәрин ахлач өөрдҗ ирәд, донҗгт бәәсн юмиг еңгәр амсв.

- Хм, - гиҗ бурҗңнад, таассн бәәдл һарад, күргн тал адһв.

- Чи сәәхн нәр белдҗ давулҗанач, - гив, - болв нег дуту бәәнә.

«Чаңһр чилҗ одв, әмтнд күртсн уга, гиҗ ода намаг гемшәх», - гиҗ санад, күргн эмәсн бәәдл һарв.

Болв нәәрин һардач тас оңдан юм келв:

- Түрүләд хамгин сән гисн чаңһрар гиичнрән тоодг авъяс бәәнә. Хөөннь кимд чаңһр кеҗ болна, халсн әмтн амтынь авшго. Чи болхла, түрүләд кимд чаңһрар тоовч, ода чини зарцнр кеҗәх чаңһр - күчтә!

Күргн терүнә келсиг яһҗ медхән ядв. Иисусин эк, Мария болхла, инәмсклҗ, Көвүн талан хәләв. Сурһульчнрнь болхла: «Үнн, әмтнд нөкд болтха, гиҗ Бурхн Эврән Иисусиг илгәв», - гиҗ санв.