Иисусин түрүн сурһульчнр

Деед Эзнә тускар Иоанн Кирсләч келн улст герчлснә хөөн нег дәкҗ Иисус Иорданд ирәд, хойр сурһульчтаһан, Андрей Иоанн хойрла, күүндв. Өөгүрнь давҗ йовсн Иисусиг үзчкәд, Терүг зааһад иигҗ келв:

- Хәләтн, энтн Бурхна Хурһн.

Тиигҗ келхләрн, таднд Эн сән багш болх, Христосиг дахтн, нанла бичә үлдтн, гиҗ Андрей Иоанн хойрт медүлв. Андрей Иоанн хойр Деед Эзнә ардас һарад йовв. Иисус ардан эргәд хәлән, ардаснь йовҗ йовх Андрей Иоанн хойриг үзн, келв:

- Та хойрт юн кергтә?

Эдн Терүнд иим хәрү өгв:

- Багш! Та альд бәәдвт?

Иисус келв:

- Өөрдәд хәләтн!

Андрей Иоаан хойр Иисусиг дахад, гертнь орҗ ирв, асхни дуусн Терүнлә давулв. Эднд Иисусла күүндхд йир байрта болв. Деед Эзн Иисусла әдләр гүн тоолвртаһар, тер дотр үнн чик седклтәһәр болн амрар урднь эднлә нег чигн күн күүндәд уга билә.

Андрей Симон ахта билә. Эцктәһән хамдан эдн Галилейск теңгсин өөр бәәдг Вифсаид балһснд бәәдг билә. Эдн цуһар заһсчнр бәәсмн. Иисусин тускар келҗ өгхәр Андрей ахан хәәһәд һарв.

- Мадн Мессияг, Христосиг олвидн! - гиҗ Симониг үзн, байртаһар эн келв.

Йовҗ Иисусла таньлдый гихләнь, ахнь дарунь зөвтә гив. Симониг үзн, Христос терүнд келв:

- Чи - Симон, Ионин көвүнч, чини нерн Кифа болтха, «чолун» гисн утхта үг (Петр).

Намаг түрүн болҗ үзсн бийнь Деед Эзн нерим меддг бәәҗ гиҗ Симон алң болв.

Симонд шин нер өгхләрн, удан цаг боллго, эн эгл заһсч «чолун» мет хату болн чаңһ әрүн итклч болхиг Иисус медлә.