Көдәд Иисусиг җилвтүлҗ сөрлһн

Урднь чигн, ода чигн Бурхна хамгин догшн хортн эрлг бәәҗ. Бурхн терүнлә даңгин ноолдна. Теңгрин Эцк Иисуст Һазр деер церглх даалһвр Иорданд өгн бийәр, эн ноолдан эклсмн. Эрлгин җилвтүллһнәс гетлгхәр Әрүн Сәкүсн Иисуссиг көдәд авч ирсн билә.

Дөчн өдр болн дөчн сө Иисус көдәд мацг бәрв. Эн цагин эргцд юм идсн, уусн уга.

Әмтиг даңгин килнцд уңһахар седдг җилвтүләч эрлг Терүн тал өөрдәд ирв. Чинәнь алдрсн Иисусиг эн җилвтүлҗ чадхув, гиҗ санв. Кемр Аврач килнц һарһхла, эрлгин күцл күцх: Эн дәкҗ әмтнә килнциг дааҗ чадшго. Әмтнд нөкд болҗ чадшго.

Эрлг келв:

- Кемр Чи Бурхна Көвүн болхла, чолуг өдмгт хүврүл!

Иисус терүнд иим хәрү өгв:

- Һанцхн идсн-уусар болдм биш. Цугнь Бурхна келсн үгәр күцдм.

Эрлг Иисуст хәрүцҗ, үг келҗ чадсн уга. Тегәд Иисусиг өндр чигн гидг уулур авч ирәд, орчлңгиг болн терүнә туурмҗиг үзүлхләрн, деегүр санатаһар келв:

- Кемр нанла өкәҗ мендлхләчн, энүг цуһараһинь чамд өгнәв.

Иисус энүнд иим хәрү өгв:

- Нанас уга бол цааран, эрлг. Юңгад гихлә Әрүн Үгд иигҗ бичәтә: «Деед Эзн Бурхнд сөгдҗ мөрг болн Терүнд цергл».

Тиигхлә эрлг Иисусиг Иерасулимд авч ирәд, хамгин өндр сумин тегш ора деер һарһчкад, зуһудсн дууһар келв:

- Кемр Чи Бурхна Көвүн болхла, эн ора деерәс һәрәд, юңгад гихлә Әрүн Үгд иигҗ бичәтә: «Чамаг һар деерән авч йовтха, чолунд бичә бүдрүлтхә гисн заавр Эврәннь Элчнртән өгчәнәв».

Библин учр-утхиг хаҗһрар медҗәх эрлглә Деед Эзн Иисус өглдсн уга. Әрүн Үгд келгдҗәхәр хәрү өгв: «Эврәннь Деед Эзн Бурхиг бичә җилвтүл».

Тиигәд эрлг Иисусас хоосн салв.