Иисусиг уснд кирсллһн

Захарии Елисавета хойрас Иоанн төрхиг Бурхна Элч Гавриил әәлдҗ келсн болдг. Бурхн Иоаннд урдаснь онц цергллһ темдглсмн. Тер саамд эн өсҗ-босҗ, Иудейск көдәд бәәдг билә.

Энд, көдә һазрт, әрүн уха-сананднь юн чигн харшлго. Иоанн төвкнүн һазрт Бурхиг соңсхар шиидв.

- Иордан орад, тенд әрүн сән зәңг тарха, - гисн Бурхна ду Иоанн соңсв.

Бурхна заксар Иоанн тиигәрән йовв. Иордана тиньгр һазрин селәдт бәәсн цуг әмтнд эн келдг билә:

- Гемән суртн! Эврәннь җирһлән сольтн! Бурхн Хан залх цаг һазрт чигн ирх! Удлго ирн гиҗәнә, белн болцхатн! Хуучарн бәәҗ болшго!

Энүнә дуудврмуд акад гиҗ әмтн сандг билә. Зәрмнь Иоанниг наад бәрдг, энүнә келсн үг зәрминнь ууринь күргүлдг билә. Зуг эн күн Бурхна Үг келҗәхиг медҗәх чигн әмтн бәәсмн.

- Кирслтн! - гиҗ Иоанн эднд дуудвр кедг билә. - Иордана уснд булхулҗ, би тадниг кирслнәв. Энтн темдг: уснд орад һархларн, тадн кирән уһасн деерән, урдк җирһлән хайҗант, гиҗ олнд медүлҗәнәт. Кирслһн таднд шин җирһлин эклц болх зөвтә.

Кесгнь кирслцхәв. Эн цагас авн шин җирһл эклҗәнәвин гиҗ эдн үр-иньгүдтән болн таньл улстан келдг билә. Эднә келсәр әмтн соньмсдг билә, Иоаннла таньлдх седкл эднд үүддг билә.

Зәрмснь Иоаннас иигҗ сурдмн:

- Соңслч! Әмтиг кирсләд, эдниг җирһлән сольтн гиҗ некх зөв кен чамд өгв? Әәлдәчнр келсн Бурхна Көвүн чи болвзач?

- Уга, - гисн хәрү Иоанн эднд өгв, - тадна келҗәх Тер бишв. Кесг җил хооран мини тускар чигн Исаия әәлдәч келсмн: «Деед Эзнд хаалһ белдхин төлә көдәд чаңһ хәәкрлһн соңсгдх». Би тадниг усар кирслхәр ирүв. Болв тадн күләҗәх Тер Әрүн Сәкүсәр кирслх. Би болхла Терүнә һосна бүс чигн тәәлх зөв угав, тедү дүңгә Тертн ик чинртә.

Тиигәд келҗәх Иоанн Иисус өөрдҗ аашхиг үзв. Цуһар зааград, Терүнд хаалһ өгв. Тиигхлә Иоанн хәәкрв:

- Хәләтн: энтн орчлңгин килнциг бийдән авдг Бурхна Хурһн! Әәлдсн юмн күцв. Мини келҗәсн ирв! - гиҗ әәлдәч Иисусиг заав.

Иисус Иоанн тал өөрдҗ ирәд, иигҗ келв:

- Намаг кирслтхә гиҗ Би чамур ирүв.

- Чамаг кирслтхә гиҗ?! - гиҗ Иоанн алң болв. - Энчн нанд Чамас кирслгдх кергтә!

- Иоанн, күцәх кергтә. Бурхна седкл тиим.

Эдн хоюрн Иордана уснд орв. Әмтиг кирслснлә әдләр Иоанн Иисусин толһа деер һаран тәвәд, энүг уснд булхулв. Болв эн саамла өвәрц йовдл учрв: Иисус уснас һарч ирсн кемлә теңгр деерәс көгҗрлһн болҗ, Әрүн Сәкүсн бууҗ ирв. Дарунь цуһар соңсв:

- Энтн Мини седклд туссн, Мини Дуран өгсн Көвүн!

Иоанн терүнд даалһсн керг күцәв. Аврач ирх гиҗ эн әмтнд келсн билә. Тер ирв - Назаретәс Иисус ирв, Бурхна Көвүн! Зуг цуг иудеймүд Деед Эзнд иткдг болв гиҗ келҗ болшго. Уга, зуг зәрм әмтн Терүг эврәннь Деед Эзнд тоолв.