Иисус өрк-бүлдән

Назаретд Иисус Иосифин модна урчин герт өслә. Иисусиг арвн хойртад Иосиф Мария хойр дахулад, Иерусалимд болсн Пасхан байрт ирв.

Иудеймүд җил болһн Пасхан байриг күләҗ, нәәрлдг билә. Зәрм әмтн кесг өдрәр Иерусалимүр ирҗ, талдан олн орн-нутгас ирсн иудеймүдлә хамдан сүмд болдг байрт орлцдг бәәсмн. Эврәннь келн улстан дурта, даңгин нөкд болдг Бурхндан эдн магтал өргдг билә. Цуг әмтн хамдан хурад, байрлдг билә. Арвн хойр насан авсн бичкдүд цуһараһаснь байрта болдмн. Тер юңгад гихлә эн наснд күрснднь түрүн болҗ сән өдрин байрт орлцх зөв өггдг бәәсмн.

Эн саамд эк-эцкнь Иисусиг дахулад, хам-хоша бәәсн улсла хамдан Иерусалим орв. Зуульчлһна йовудт Эн ю эс үзв, ю эс соңсв! Хаалһин йовудт олн соньн юмн харһв, болв балһсна бәәдл, тенд үзсн хамг тоот терүнәс даву соньн болв. Сәәхн чигн гидг сүм, тенд дегц оларн зальврҗах улсин дун гиһит! Иисусиг хамгин түрүнд сүмд яһҗ мөргүл давдгнь соньмсулдг билә. Сүмд күцәгдҗәх әрүн үүлдврин болн авъясин учр-утхиг эк-эцкнь Көвүндән тодрхаһар цәәлһҗ өгв.

Сән өдрин байр долан хонгтан давв. Төгсхләнь, байрт орсн әмтн хәрхәр белдцхәв. Мария Иосиф хойр Көвүһән хәәхлә, тернь олдсн уга. Даңгин хам-хоша улслаһан йовдг Көвүнь теднлә хәрсн болх гиҗ эдн санв. Тиигҗ сансн эк-эцк Көвүндән далаһар зовлго, хәрәд һарцхав. Асхн шидр эдн Назаретәс байрт орлцхар ирсн әмтиг күцв. Иисус эднлә йовсн уга бәәҗ. Эк эцк хойр Көвүнь яһсн болх, гиҗ зовв. Ода яһдг болхмб?

Эдн Көвүһән хәәһәд, хәрү Иерусалимд ирцхәв. Кесгтән эдн Иисусиг хәәв. Арвн хойрта көвүг тадн үзсн угайт, гиһәд әмтнәс сурад, эс одсн һазр уга. Иим насни көвүдиг кесгнь үзв чигн, зуг тедн дунд эн әмтн хәәҗ йовсн көвүн харһсн, угаһинь меддг арһ уга. Тегәд Иисус ода альд бәәхинь эдн келҗ чадсн уга. Альд йовна гиҗ хәәхв?

Иосиф Мария хойр Көвүнләнь ода юн учрв, гиҗ улм әәцхәв. Сүмд бәәвзго гиһәд, эдн дәкәд нааран ирв. Көвүһән олх гисн ицлән геесн эк-эцк Бурхна Үг цәәлһдг улсин хораһур ирв. Көвүһән энд олхвидн гиҗ эдн сансн уга билә. Номта улсин дунд Көвүн ю кехмб? Эднә күүндсиг медҗ чадшго, келснь Энүнд соньн болшго.

Болв Көвүнь сүмд бәәсн бәәҗ. Мария Иосиф хойр Терүг үзхләрн, нам бийстән итксн уга. Иисус Бурхна Үг цәәлһдг улст амр биш сурврмуд өгхләг, теднь әрә гиҗ хәрүһинь олна. Тедн сурвр өгхлә, Иисус йир цецн ухата хәрү өгәд бәәнә. Тиим хәрү болһна хөөн багшнр толһаһан зәәләд, эн Көвүн ямаран цецн ухата гиһәд өврәд бәәнә.

Көвүһән олсндан байрлсн Мария Иосиф хойр Иосифиг теврәд үмсв. Дарунь Мария шоодҗ сурв:

- Чи альд йовлач? Мадн Чамаг хән гиҗ цуцрвидн!

Иисус иим хәрү өгв:

- Цуг цагин эргц би энд бәәләв. Мини теңгрин Эцкин герт намаг бәәсиг тадн медсн угайт?

Иосиф чигн, Мария чигн Энүнә келсиг медсн уга. Эдн Көвүһән авад, Назарет орад хәрцхәв.

Җил ирвәс өсх дутман Иисус улм цецн ухата болв. Эк-эцкдән Эн дурта билә. Эднән соңсҗ, үгәснь һарлго, эн дәкәд арвн нәәмн җилдән эк-эцктәһән бәәв. Сүмд олҗ авхднь Көвүнәннь келсн үг Мариян сананас һарлго, эн даңгин ухалад билә.