Даниил Дария хаана бәәшңд

Мидян болн перс келн улсин нутгиг Кир гидг хан толһалв. Вавилон балһснд хан болҗ Дарияг тәвсмн. Нутгиг толһалх зун хөрн түшмлиг хан заав. Ташр теднә деер һурвн нойиг әмтнә бәәдл-җирһл, диг-дараһинь харх болҗ тәвсмн. Дария хан Даниилыг йир күндлдг бәәҗ. Зуг дотр-дунднь үлү үздг улс һарч ирнә. Даниилыг уга кех нууц шиидвр эдн хоорндан һарһв. Хаанур эдн ирәд, терүг магтҗ келнә:

- Алдр Дария хан, мөңкинд менд йовтха! Һольшг заңгта, хәәрлдг седклтә та - мана Хан! Тана нилчәр олн-әмтн сән-сәәхн бәәнә. Терүг олнд медүлх кергтә! Эврә нерн деерәс, та хан, зәрлг һарһтн! Цуг әмтн һучн хонгин туршарт талдан улсас, Бурхнас чигн селвг сурдган уурх. Һанц таниг күндләд, сүв-селвгән сурдган болтха! Тиигҗ, әмтн тана хәәртә седкл медҗ авх! - гиҗ хаанд келнә.

- Йир сән уха орулвт! - гиҗ хан байртаһар хәрү өгнә. - Би тиим зәрлг һарһҗ, һаран тәвнәв! Кемр эн зәрлгиг эвдсн күн арслңгудын нүкнд оч тусх!