Валтасарин нәр

Навуходоносор хан өңгрснә хөөн Вавилона хан Валтасар көвүнь болв.

Эн хан нәәрлхдән йир дурта болад, эврәннь җирһлиннь цаган нәр-наадар давулдг билә. Вавилона орн-нутгиг хортн бүсләд авчксн цагла, Валтасар хан бәәшңдән нәр кеҗ.

Орн-нутгин кесг миңһн зәәсңгүд элвг чаһр асхрҗасн нәәрт ирцхәҗ. Валтасар согтхларн, алтн болн цаһан мөңгн савмуд авч иртхә гиҗ заксмн. Эн алтн, цаһан мөңгн савмудыг Валтасарин эцкнь, Навуходоносор хан, Иерусалимин Бурхна сүмәс булаҗ авла. Хан Валтасар болн терүнә зәәсңгүд авч ирсн ааһ-савас чаһр ууһад, теднә нутиг хортнас харсҗ авх гиҗ ухалад, күүнә һарар кесн бурхдиг магтҗ.

Генткн эднә суусн хорад тагчг болв. Нег эрс деер бичҗәсн күүнә һарин баһлцг эдн үзв. Эн бичсн нууц үгмүд үзчкәд, хан болн терүнә гиичнр ик гидгәр сүрдв. Нег чигн күн бичгдсн эн үгмүдиг умшҗ чадсн уга. Хаана хойр өвдгнь чичрәд, чирәнь цәәҗ одв. Эн үгмүдин чинринь хан медәд уга билә, зуг эн хорад учрҗасн юмн терүнд сән юм авч иршгоһинь тер тодрхаһар медв.

Тегәд эн чаңһар хәәкрәд, Вавилона цуг цецн улсиг дуудтн гиҗ зәрлг өгв. Эн бичәтә үгмүдиг цәәлһҗ өгсн күүнд хан өрн-нутгиннь кесг сән юм өгхв гиҗ амн үгән өгв. Болв цецн улс эрс деер бичәтә үгмүдин чинринь цәәлһҗ чадсмн уга. Цуг энүг үзсн Валтасарин экнь иигҗ келҗ: «Бурхна Әрүн Сәкүстә Даниил гидг күн бәәнә. Даниилыг Навуходоносор хан цуг нутгин цецн улсин толһачар тәвсмн».

Даниилыг дуудад авч ирхлә, Валтасар келв:

- Чамаг цецн ухата болн чамд Бурхна Әрүн Сәкүсн бәәхинь би соңсв. Вавилона цуг цецн ухата улс эн эрс деер бичгдсн үгмүдин чинр-утх цәәлһҗ чадсн уга. Кемр чи цәәлһҗ чадхла, чамаг ик ачлвр күдәҗәнә.

Зуг Даниил иим хәрү терүнд өгв:

- Нанд өгхәр бәәх белгүдчн чамд үлдтхә. Би бичгдсн үгмүдин чинр-утхиг тана белг угаһар умшч болн цәәлһҗ өгнәв!

Цааранднь Даниил келв:

- Һазр деер бәәсн хаадуд болн келн улс Бурхна һарт бәәнә. Зуг чи, Валтасар, Бурхна келсиг соңссн угач, зуркән Терүнд өгсн угач, эврә дурарн бәәвүч. Чи дегд ик санатач. Эврәннь зәәсңгүдтәһән болн гергчүдтәһән Бурхна герин ааһ-савас чаһр ууһад, юм үздго, юм соңсдго алтар, цаһан мөңгәр, модар, чолуһар кесн бурхдан магтвт. Зуг чамд әм өгсн болн чини җирһлин хаалһ һартан бәрҗ йовсн Бурхиг магтсн угач. Тегәд чигн чамд һар болн бичгдсн 4 үг илгәгдсмн.

- МЕНЕ, МЕНЕ, ТЕКЕЛ, УПАРСИН - эн дөрвн үг эрс деер бичәтә. Эн үгмүдин чинр-утхнь иим: «Чи орн-нутгин хан болҗ залсна цагнь чилв гиҗ Бурхн тоолҗана гиҗ медүлҗәнә. Чиңнүрдсн кемд чи йир гиигн болвч. Тегәд чини нутг мидянмудт болн персмүдт хувагдҗ өггдх».

Тер сөөһәр Валтасариг алад, Вавилониг болхла персмудин хан Кир эзлсмн. Тиим кевәр Вавилона орн-нутгин хаана йосн хольврад чилсмн.