Даниил арслңгудын нүкнд

Перс болн мидян келн улсин һарһсн закврмудыг эвддго бәәсмн. Һар тәвсн хан болвчн сольх зөв уга. Удан боллго Даниил чигн шин һарсн зака соңгсв. Тер бийнь, тогтсн авъясарн, өдр болһн, һурв дәкҗ Деед Эзнд көлән чөкләд, мөргәд бәәв. Терүг һаза гетҗәсн хаана зарцнр, секәтә терзәр, зальврһинь соңгсад, гертәснь бәрәд авна.

Удл уга, тедн Дарий хаана өмн зогсч үзсн-соңгссн юман келҗ өгв. Хан теднә келсиг соңгсчкад, зөвәр зовад бәәв.

- Уга, тиим биш болх! - гиҗ хан хәәкрв. - Тадн айстан мини сән гисн түшмлд болн нәәҗд, му нер өгчәнәт! Тиим йовдл һарһҗ болшго!

- Алдр хан! Бидн эн күүнд му кехәр бәәхшвидн! - гиҗ теднә негнь келнә. - Закана неквр тиим болҗана.

- Чи худл келҗәнәч! Тадн Даниилыг уга кехәр, эн зака нанар һарһулсн болҗанат! Нүднәсм далд, уга болтн цааран! - гиҗ уурлҗ хан хәәкрв.

Дарий арһан бәрәд бәәв. Өдрин дуусн ухалад, нөкднртәһән, нәәҗнртәһән сүв-селвгәрн хувалцад, чееҗәрн зовад бәәҗ. Зуг хаана зәрлгиг яһҗ эвдхиг нег чигн күн медхш. Зөвәр уйдад бәәсн хан Даниилүр ирнә. Тернь арслңгудын нүкнә амн деер зогсчасмн. Нүкнд бәәсн арслңгудыг цөөкн өдр хот өглго һалзурхлань үүл һарһсн, йос эвдсн улсиг теднүр орулна.

Чееҗәрн зовсн хан Дарий Даниилын ээм деернь һаран тәвнә.

- Чини Бурхн чамаг хәәрлҗ автха, үнн-седкләрн Терүнд чи церглҗәнәч. Мини арһ тасрв, чамд нөкд болҗ чадшгов.

Хан Даниилыг нүкнд хайх докъя өгнә.

Өдрин дуусн хан бәәшңгдән хот идлго, сөөднь унтлго зовад кевтнә. Өрүн өрлә хан босч гүүһәд, арслңгудын нүкнүр өөрдәд хәәкрв:

- Даниил! - чичрҗ дуудад, - чи одачн әмд бәнч? Бурхнчн чамаг хәәрләд авсн болвза? - гинә.

Нүкнәс Даниилын әрә һарсн дун соңгсгдв:

- Тиим, хан минь! Бурхн Элчән илгәҗ, арслңгудын аминь хаачкв. Тедн нанд хорлтан хальдасн уга. Бурхн намаг му юм эс һарһсиг медлә!

Хаана зарцнр Даниилыг шулун гидгәр нүкнәс һарһв. Цогц-махмуднь тер кевәрн. Хан йир икәр байрлв.

Бәәшңгдән ирәд, иим зәрлг һарһна:

- Харш күргсн улсиг мини закврар арслңгудын нүкнд хайтн!

Дарунь, эврә нерн деерәс элчнртән бичг илгәв:

- Цуг нутгин әмтн Даниилын Бурхнд итктхә! Терүнә Бурхн - әмд Бурхн! Әмд Бурхна күчн мөңкинд чилшго, ямаранчн әәмшгәс әм аврх!