Шачасн һал

Навуходоносор хан ик саната күн болсндан, бийән ик чинртә гиҗ сансмн. Эн Даниилын церглҗәх Бурхн үнн болн һанцхн Бурхинь меддг билә, зуг дарунь мартчксмн. Нег дәкҗ хан алтар цутхсн бурх келгүләд, цуг әмтиг терүнд сөгдтхә гисн заквр өгч. Тегәд эн нәр кеҗ. Әмтн цуһар цуглрҗ, тедн дунд Даниилын үүрмүд бәәҗ. Тенд хан иигҗ келсмн: «Әмтн цуһар көгҗмин ә соңсхларн, цуһар алтар цутхсн бурхнд сөгдтн, зуг тиим юм кешго әмтн шачасн һалд шивәд хайхмб».

Нәр экләд, көгҗмин ә соңгдхла, цуһар һазрт унад, алтар цутхсн бурхнд сөгдцхәҗ. Зуг иудей улсин һурвн көвүн терүнд сөгдсмн уга. Зарцнр хаанд одад иигҗ келсмн:

- Хан мана, Седрах, Мисах болн Адвенаго тана заквриг күцәҗәхш, алтн бурхнд сөгдҗәхш.

Хан икәр уурлад, тедниг нааран авч иртн гив. Тедниг авч ирхлә, хан келв:

- Кемр тадн алтн бурхнд эс сөгдхлә, тер дарунь тадниг шачасн һалд хайчкх. Тиигхлә ямаран чигн бурхн тадниг мини һарас харсҗ авхмб?

Седрах, Мисах болн Авденаго хаанд иим хәрү өгч:

- Мадн церглҗәсн Бурхн чини һарас болн шачах һалас мадниг харсҗ авх күчтә. Болв эс харсв чигн бидн чини бурхдудт болн алтар цутхсн бурхнд сөгдшговидн!

Эднә хәрүһинь соңссн Навуходоносор улм икәр уурлад закв:

- Бешиг долан холва үлү күчтәһәр шататн. Дәкәд эн баһ наста һурвн көвүг күләд, шачасн һалд хайчктн гиҗ хамгин чидлтә цергчнрт заксмн. Бешин һал ик суркә болад, тедниг бешт хайҗасн цергчнр шатҗ оч. Күләтә баһ наста һурвн көвүн һалд унв.

Шачасн һалур хан хәләҗәһәд, икәр сүрдәд болн алң болҗ. Дегәд өвәрц юм үзв! Эн адһмтаһар босад, эврәннь зарцнрасн сурҗ:

- Мадн күлсн һурвн залу һалд хайсмн биший?

- Э, тиим, - гиҗ тедн хәрү өгч.

Хан әрә дууһар келҗ:

- Ода би дөрвн цев уга залу үзҗәнәв. Дөрвдгч залунь Бурхна Көвүнә дүрстә.

Эн һалур гүүҗ өөрдәд хәәкрв:

- Седрах, Мисах, Авденаго - Бурхна цергләчнр һартн! Наартн! Нанур өөрдтн!

Тедн һал дотрас һарв, хаанур өөрдв. Һал теднд күрсн уга, цогц-махмуднь шатсн уга, толһаннь нег чигн үсн шатсн уга, хувцнь өгрсн уга, теднд шатсн үнр чигн орсн уга. Цуг эн учрсн йовдл теднд дегд өврмҗтә болҗ, юңгад гихлә, теднә хамгин чидлтә гисн цергчнр һалын амн деер шатҗ одла.

Навуходоносор хаана арһнь тасрад, иудей улсин һурвн көвүн церглҗәх Бурхна күчинь үзәд, иигҗ келсмн:

- Седрах, Мисах болн Авденагин Бурхн әдстә! Эн Бурхнд иткҗәх баһ наста һурвн зарцан халун һалас хәәрлҗ аврхин төлә Эврәннь Элчән Бурхн илгәҗ. Эдн үкләс әәлго Эврәннь Бурхндан сөгдсмн, талдан бурхдт церглшго, сөгдшго!

Хан баһ наста һурвн көвүнд ачлвран өгәд, тедниг Вавилона нутгт деегшлв.