Даниил болн терүнә үрмүд

Навуходоносор хаана бәәшңгд бәрәнд бәргдсн иудей улсин хаадудын болн нойдудын үңг-тохмта цөөкн баһ наста көвүд бәәсмн. Хан онц зура күцәхин төлә эн көвүдиг шүүҗ авсмн. Һурвн җилдән эднд вавилона кел болн олн зүсн ном дасхтн эн гиҗ. Эврәннь әвртә гидг ик орн-нутган хан күцәмҗтәһәр залхар, эн баһ наста көвүдиг терүнд нөкд болхин төлә шүүҗ авла. Көвүдин нерд Даниил, Анания, Мисаил болн Азария бәәҗ. Болв Вавилона хаана бәәшңгд иудей улсин тускар нег чигн юмн бичә сана орултха гиһәд, теднә нерднь соляд, Валтасар, Седрах, Мисах болн Авденаго гидг нерд өгч.

Зуг, бәрәнд бәәсн үүрмүд, цааранднь чигн эврәннь Бурхндан иткәд, зальврад бәәҗ. Тегәд, эдниг үкләр әәлһв чигн, хамгин түрүнд бийән бузрдшгоһар хаана хот болн чаһр идшговидн, гиҗ эдн шиидцхәв.

Көвүдин зөргиг болн итклиг Бурхн таасад, эднд әдсән өгв. Цецн уха, медрл, сурһуль дасх билг-эрдм, сәәхн өкәр чирә болн чаңһ-чиирг цогц Бурхн бас көвүдт өгсмн.

Даниилд болхла Бурхна Әрүн Сәкүсәр дамҗулад, үзгдлин, зүүдин тәәлвринь олдг онц билг Бурхн белглв.

Нег дәкҗ Навуходоносор хаана зүүдин тәәлвр нег чигн күн цәәлһҗ чадсмн уга. Даниил тер зүүднә тәәлвринь цәәлһҗ өгч. Тегәд хан ик гидгәр өврәд бәәхлә, Даниил терүнд иим хәрү өгч: «Тана зүүднә тәәлвр келснд мини ач уга. Нанд эн билг Бурхн өглә». Даниил сөгддг Бурхиг Навуходоносор магтв.