Бәрәнд бәргдлһн

Соломон хан алдр болн байн орн-нутг экләд залсн цагас нааран һурвн зун җил даву болсмн.

Соломон хан өңгрснә хөөн орн-нутг хойр әңгд хувагдла. Иерусалим хамгин һол балһсн болад үлдсмн. Тенд хаана бәәшң болн һәәхмҗтә Соломона тосхсн сүм билә. Ода эн һазриг Иудея гиҗ нерәдҗ.

Харм төрхд, хан чигн, әмтн чигн талдан келн улсин болн һарар кесн бурхдт сөгдәд, Бурхн заасн хаалһас хаҗиһәд, Терүнә зааврмуд күцәсмн уга. Бурхн Эврәннь әәлдәчнрәр дамҗад кесг дәкҗ әмтиг килнцән хаяд, гемән суртн гиҗ дуудсмн, зуг нег чигн күн соңссмн уга.

Тегәд Бурхна зарһ ирәд, Вавилона церг эн орн-нүтгиг дәәләд авчксмн.

Навуходоносор гидг нертә Вавилона хан цуг иудейин хортнас хамгин әәмшгтә хортн бәәҗ. Эн Иерусалимур цергчнртәһән орад, Иудеин хааг бәрәнд авад, Бурхна герәс цуг алтн болн цаһан мөңгн ааһ-сав авад талдан келн улсин сүмд тәвҗ. Вавилона улс Бурхна герт болн Соломона бәәшңгд бәәсн үнтә зөөр авцхаҗ. Тиигҗ хамхлад күүчсн хөөн, тедн хаана бәәшң, сүм болн байн улсин гермүд шатасмн.

Навуходоносор хаана болн баячудын көвүдиг, баһ наста залусиг, долан миңһн хамгин сән цергчнриг, урч болн дархна улсиг тууһад бәрәнд авад йовсмн.

Тиигҗ Иудея болн Иерусалим Вавилона хаана цергт диилгдәд, терүнә һарт орсмн.

Хаҗһр хаалһд орад, сансарн бәәдг килнцтә Эврәннь келн улсан тиим кевәр Деед Эзн засглҗ Бурхна зарһан кев. Израилин әмтн Вавилона бәрәнд бәәһәд, һарар кесн бурхд-худл бурхд болсинь ухалад, Деед Эзн - йосн үннч Бурхинь медҗ авх зөвтә билә.