Нинеевин улсин гемән сурлһна туск тууҗ

Цөөкн долан хонг давад, Иона Нинеевий балһснд күрв. Эн алдр балһсна уульнцсар Иона йовад, Бурхна келсн үг цәәлһҗ:

- Дөчн өдр болад Нинеевия балһсн нурад уга болх.

Акад юмб, нег чигн күн терүгәр наад бәрсн уга. Нег чигн күн терүнүр дәврсн уга, әәмшгтә юм үзүлсн уга. Әмтн Ионан келсн үгд иткв. Бурхн балһснд белдҗәх аюл әмтн чик гиҗ санҗ. Юңгад гихлә, тедн дала гисн келн улсла дәәллдсмн, кесг му, хорта болн хар саната юм кесн бәәҗ. Тегәд тиим хар саната йовдлмуд засгдлго үлддмн биш гиҗ нинеевитянмуд тоолдг бәәсмн.

Хан әәлдәч Иона болн терүнә цәәлһҗ өгсн Бурхна зарһин тускар бас соңсад, иим зәрлг бичәд, эврәннь орн-нутгар тархаҗ илгәв:

- Цуг әмтн Бурхнд зальвртха! Кен медлә Бурхн талданар ухалад, мадниг хәәрләд бидн үкхн уга болвза. Цуһар мацг өдрмүд экләд, үнтә хувцан тәәләд, шүрүн эдәр уйсн хувц өмстхә. Цуг әмтн хар саната йовдл һарһдган уурад, буруһан-гемән сурад зальвртха!

Дөчн өдр давв. Иона өндр толһа деер балһсна өмн бийд зогсв. Эн Нинеевиг нурад, уга болхнь күләв. Болв юмн болсн уга. Өдр чилҗ йовна, Нинеевия болхла тер кевтән зогсна. Тиигхлә Иона һундад йир икәр уурлв. Юуни төлә Бурхна зарһин тускарт эн келсмб? Хар саната Нинеевин улс үксн болхла чик болх билә.

Тер өдр дегд халун билә. Өөдм деер суусн Ионан толһань халад, тегәд эн улм һундад уурлад бәәҗ. Өрүһәр эн серәд, бийиннь өөр ик урһмл үзв. Урһмлын хамтхасн һаң халунас терүг халхлв. Терүнә сүүдрт Иона сууһад икәр байрлв.

Эн урһмл Бурхна келсәр шулун урһсн бәәҗ. Зуг маңһдуртнь Бурхна заасар урһмл хагсад унҗ одна.

Иона икәр һундад келв: «Әмд бәәсн дорхнь э, үксн деер».

Тегәд Бурхн Ионад келв:

- Чамд урһмл харм болҗану? Чи эврән күч-көлсән һарһҗ эс урһасн урһмл хармнҗанач? Нанд болхла Нинеевия балһснд бәәсн олн әмтн юңгад эс харм болхмб?

Тегәд Деед Эзн цаһан санатаһинь, удан тесвртәһинь, әмтнә буруһинь тәвҗ өгдг байн хәәрлтәһинь Иона ода ирҗ медв.